Almatylyq dárigerler balanyń julynyp ketken saýsaǵyn qalpyna keltirdi
ALMATY. KAZINFORM – Almaty qalalyq №2 balalar klınıkalyq aýrýhanasynda tolyqtaı julynyp ketken saýsaqty qaıta jalǵaý boıynsha óte kúrdeli ota jasaldy.
5 jasar balanyń shynashaǵy temir qaqpaǵa qysylyp qalyp, julynyp ketken. Ol dereý aýrýhanaǵa jetkizildi.
Aýrýhanaǵa túsken sátte naýqasty kezekshi mamandar toby, travmatologııa bólimshesiniń meńgerýshisi jáne mıkrohırýrg qarap shyqty. Julynyp ketken saýsaqtyń qan aǵymyn qalpyna keltirý úshin dereý ota jasaldy.
Aýrýhananyń travmatologııa bólimshesiniń meńgerýshisi Erlan Sadyrbalın bul hırýrgııalyq sheberlikti talap etkenin atap ótti.
– Búkil komandadan erekshe dáldikti talap etetin kúrdeli jaǵdaı boldy, óıtkeni dıametri birneshe mıllımetrden aspaıtyn qan tamyrlary men júıkelerdi qalpyna keltirý qajet edi. Julynyp ketken saýsaq óńdelip, arnaıy saqtaý ortasyna ornalastyryldy. Ota aldynda qannyń reologııalyq qasıetterin jaqsartý sharalary júrgizildi, — dep túsindirdi Erlan Sadyrbalın.
Ota tórt saǵatqa sozyldy. Hırýrgtar arnaıy medıtsınalyq mıkroskoptyń kómegimen ǵana kórinetin óte jińishke tigisterdi paıdalanǵan.
Osylaısha dıametri nebári 1 mm bolatyn arterııa, sondaı-aq sińirler, júıke men vena sátti qalpyna keltirildi. Otadan keıin bala aýrýhanada mamandardyń baqylaýynda boldy.
Dárigerler qaıta jalǵanǵan bóliktiń jazylý protsesin jáne qyzmetiniń qalpyna kelýin muqııat qadaǵalap otyrdy.
Eske salsaq, Almatyda dárigerler besinshi qabattan qulaǵan 4 jasar balany aman alyp qalǵan edi.
