Almatylyq dárigerler aýyr júrek aýrýy bar naýqasqa kúrdeli ota jasady

ALMATY. KAZINFORM – Kardıologııa jáne ishki aýrýlar ǵylymı-zertteý ınstıtýtynyń mamandary koronarlyq arterııalardyń aýyr diń jáne úsh tamyrly zaqymdanýy, júrektiń qanmen qamtamasyz etilýiniń sol jaq túri bar 61 jastaǵy patsıentke kúrdeli endovaskýlıarlyq aralasýdy sátti júrgizdi.

Patsıent birneshe jyl boıy tós súıeginiń artyndaǵy mezgil-mezgil aýyrsyný men jattyǵý kezinde entigýdi sezinip, qan qysymy 170/90-ǵa deıin kóterilgen. Júktemege tózimdiligi birtindep tómendep, qysym turaqsyz bola bastaǵan. Burynǵy koronarangıografııada mańyzdy stenozdar, onyń ishinde sol jaq koronarlyq arterııa dińiniń tarylýy anyqtalǵan.

2022 jáne 2025 jyldary aortokoronarlyq shýnttaý usynylǵanymen, patsıent operatsııadan úzildi-kesildi bas tartqan.

KІAǴZI ınterventsııalyq kardıology Almat Qaljanovtyń aıtýynsha, ehokardıografııalyq zertteý júrektiń sorý fýnktsııasynyń aıqyn buzylýyn kórsetti, shyǵarý fraktsııasy 43%-ǵa deıin tómendegen. Birneshe konsılıýmnan keıin jáne qaýipteri túsindirilgennen soń da patsıent ashyq operatsııaǵa kelisim bermegen.

Sondyqtan koronarangıografııa jáne sol jaq koronarlyq jáne aldyńǵy tómen túsetin arterııalardyń dińin stentteý tamyrishilik ýltradybystyq zertteý (TІÝDZ) kómegimen jasaldy.

«Bul ádis arterııany ishinen kórip, dıametrin 0,1 mm dáldikpen ólsheýge, stenozdyń dárejesin dálirek anyqtaýǵa jáne stent pen ballonnyń eń qolaıly mólsherin tańdaýǵa múmkindik beredi», – dedi dáriger.

Operatsııa asqynýsyz ótti. Alǵashqy saǵattarda patsıent entigý men aýyrsynýdyń azaıǵanyn, jaǵdaıynyń jaqsarǵanyn baıqady. Erte kezeńde fızıkalyq belsendilikke tózimdiligi artty.

Dárigerlerdiń aıtýynsha, zamanaýı endovaskýlıarlyq tehnologııalar kúrdeli jaǵdaılarda da patsıenttiń jaǵdaıyn tez ári klınıkalyq turǵydan jaqsartýǵa múmkindik beredi.

Aıta keteıik, Almatyda birden 24 balaǵa ota jasaldy.