Almatyda 76 jastaǵy zeınetkerdiń júregine elektrodsyz kardıostımýlıator qoıyldy
Almatydaǵy Kardıologııa jáne ishki aýrýlar ǵylymı-zertteý ınstıtýtynyń dárigerleri alǵash ret 76 jastaǵy patsıentke elektrodsyz kardıostımýlıator saldy, dep habarlaıdy Kazinform.
Dárigerlerdiń sózinshe, atalǵan qurylǵy júrektiń yrǵaǵyn baqylap, soǵýyn jaqsartady. Ári ol shaǵyn bolǵandyqtan júrekke salmaq túsirmeıdi.
«Buǵan deıin 2016 jyly naýqasqa ádettegideı elektrokardıostımýlıator salynǵan, biraq kóp jyldan keıin aǵzasy ony jatsyna bastaǵan. Bizdiń arıtmologtar alǵash ret elektrodsyz kardıostımýlıatordy A.Syzǵanov atyndaǵy Ulttyq ǵylymı hırýrgııa ortalyǵynyń rentgenhırýrgııa, ınterventsııalyq kardıologııa jáne arıtmologııa bólimshesiniń meńgerýshisi Ádil Baımbetovtiń basshylyǵymen saldy. Kelesi operatsııalardy ózimiz jasaıtyn bolamyz», - deıdi basqarma tóraǵasy Marat Pashımov.
40 mınýtqa sozylǵan operatsııa sátti aıaqtaldy. Micro kardıostımýlıatordyń elektrody men batareıasy ishinde bolady.
«Ol buǵana asty, teri arqyly qoıylmaıdy. Úlken tamyr arqyly júrektiń ishinde oń jaq qarynshasynda ornalasady. Jaı kardıostımýlıatordyń batareıasy teriniń astyna, buǵananyń astyna tigiledi. Oǵan elektrod qosylady. Ol elektrod úlken kúre tamyr arqyly ótedi. Sóıtip baryp júrektiń ishine bekitiledi. Micranyń basty artyqshylyqtarynyń biri – onyń uzaq qyzmet etý merzimi. Batareıanyń jańa býyny qurylǵynyń 12 jylǵa deıin jumys isteýine múmkindik beredi» - dedi «Kardıologııa jáne ishki aýrýlar» ǴZI bólim meńgerýshisi Baǵdat Ahyt.
