Almatylyq dárigerler 6 keli mıomany áıel jatyrynan alyp tastady

ALMATY. KAZINFORM – Almaty kópsalaly klınıkalyq aýrýhanasynyń gınekolog dárigerleri óte aýyr jaǵdaıda aýrýhanaǵa túsken 48 jastaǵy naýqasqa jatyr mıomasy dıagnozy boıynsha sátti ota jasady.

Almaty kópsalaly klınıkalyq aýrýhanasynyń baspasóz qyzmeti málim etkendeı, naýqas birneshe jyl gınekolog dárigerge qaralmaǵan jáne ishiniń ulǵaıýyna nazar aýdarmaǵan.

Medıtsınalyq kómekke densaýlyǵy nasharlaǵanan keıin ǵana júgingen. Otany tájirıbeli gınekolog dárigerler Rıza Keremqulova, Ajar Amangeldi jáne Darhan Moldabek jasady.

– Operatsııa barysynda biz salmaǵy 6 keli bolatyn jatyr mıomasyn alyp tastadyq. Qysylyp qalǵan ishki aǵzalardy bosattyq, ilespe jabysqaq túzilimderdi alyp tastadyq, - dedi gınekologııa bólimshesiniń meńgerýshisi Rıza Keremqulova.

Operatsııa mindetti áleýmettik medıtsınalyq saqtandyrý (MÁMS) aıasynda jasaldy. 

Dárigerler áıelder jylyna minedetti túrde eki ret gınekologqa qaralý kerektigin eske salady. 

Osyǵan deıin Almaty qalasynyń №2 qalalyq perınataldyq ortalyǵynda úshemniń dúnıege kelgeni týraly jazǵan edik.