Almatylyq dárigerler 4-qabattan qulaǵan áıeldi aman alyp qaldy
ALMATY. KAZINFORM — Almaty qalalyq ortalyq klınıkalyq aýrýhanasyna tórtinshi qabattan qulap, aýyr jaraqat alǵan áıel shuǵyl jetkizildi.
Almaty qoǵamdyq densaýlyq saqtaý basqarmasynyń ókilderiniń aıtýynsha, áıelge kúrdeli ota jasaldy. Em nátıjesinde naýqastyń jaǵdaıy jaqsaryp, aýrýhanadan shyǵaryldy.
Aýrýhanaǵa túsken kezde naýqastyń ekinshi dárejeli komaǵa túskeni, qan qysymynyń kúrt tómendegeni, jaraqattyq jáne gemorragııalyq shok alǵany anyqtaldy. Sonymen qatar jambas súıekteri birneshe jerden synyp, keýde tusy aýyr zaqymdanǵan.
Alǵashqy kezeńde dárigerler naýqastyń ómirlik mańyzdy aǵza qyzmetin qalpyna keltirýge baǵyttalǵan shuǵyl sharalar qabyldady. Jaǵdaıy turaqtanǵannan keıin ony otaǵa daıyndady.
Jambas súıekterin qalpyna keltirip, bekitý otasyn travmatolog-ortopedter Dáýlet Chýkmanov pen Nurjan Nuraly jasady. Anestezıologııalyq kómekti Ashat Qasymuly kórsetti. Hırýrgter zaqymdanǵan súıekterdi arnaıy metall plastınalar men burandalardyń kómegimen bekitti.
— Otadan keıingi ekinshi kúni-aq naýqasty birtindep qozǵalysqa keltirý jumystary bastaldy. Keıingi emdeý sharalarynyń nátıjesinde densaýlyǵy birtindep jaqsardy. Aýrýhanada 18 kún em qabyldaǵan áıel qanaǵattanarlyq jaǵdaıda úıine shyǵaryldy, — delingen habarlamada.
Almaty qoǵamdyq densaýlyq saqtaý basqarmasynyń málimetinshe, naýqastyń ómirin saqtap qalýda shuǵyl medıtsınalyq kómektiń ýaqytyly kórsetilýi, dárigerlerdiń kásibıligi men medıtsına mamandarynyń úılesimdi jumysy sheshýshi ról atqarǵan.
Eske salaıyq, Almatyda dárigerler 8-qabattan qulaǵan jasóspirimdi aman alyp qalǵan edi.