Almatylyq áıel avtobýsta 4,1 mln teńgeniń aqshasy men altynyn urlaǵan

ALMATY. KAZINFORM – Almatyda polıtsııa qyzmetkerleri qoǵamdyq kólikte urlyq jasady degen kúdikpen áıel adamdy ustady.

Tergeý barysynda kúdiktiniń tańerteńgi ýaqytta avtobýs ishinde jolaýshynyń sómkesinen jasyryn túrde ulttyq jáne shetel valıýtasyndaǵy qarajatty, sondaı-aq altyn buıymdardy urlaǵany anyqtaldy. Keltirilgen materıaldyq shyǵynnyń jalpy somasy 4,1 mıllıon teńgeden asty.

Polıtsııanyń málimetinshe, jedel tergeý is-sharalary barysynda kúdiktiniń qylmysqa qatysy bary tolyq dáleldendi. Tintý kezinde urlyq faktisin rastaıtyn zattaı dáleldemeler, onyń ishinde urlanǵan múliktiń bir bóligi tárkilendi.

– Sonymen qatar kúdiktiniń kinási qoǵamdyq kólik salonynda ornatylǵan beınebaqylaý kameralarynyń jazbalarymen de dáleldenip otyr. Atalǵan derek boıynsha qylmystyq is qozǵalyp, kúdikti ýaqytsha ustaý ızolıatoryna qamaldy. Qazirgi ýaqytta tergeý amaldary jalǵasyp jatyr, - dedi Almaty polıtsııa departamenti krımınaldyq polıtsııa basqarmasynyń bastyǵy Ashat Dáýletııarov.

Polıtsııa azamattardy jeke qaýipsizdik sharalaryn saqtaýǵa, qoǵamdyq kólikte júrgende jeke múlkine asa muqııat bolýǵa úndedi.

Eske salaıyq, buǵan deıin Almatyda jańa jyl qarbalasynda urlyq jasaǵan kúdiktiler ustalǵanyn jazǵanbyz.