Almatylyq áıel aýrýhanada dárigerge qol kótergen: polıtsııa tekseristi bastady
ALMATY. KAZINFORM — Almatydaǵy juqpaly aýrýlar aýrýhanasynda eki jasar balanyń anasy men dáriger arasynda janjal shyqty. Oqıǵanyń vıdeosy áleýmettik jelilerde tarap, polıtsııa tekserý jumystaryn bastady.
Almaty qoǵamdyq densaýlyq saqtaý basqarmasynyń málimetinshe, 2026 jylǵy 31 mamyrda eki jasar bala juqpaly aýrýlar aýrýhanasyna jetkizilgen. Dárigerler tekserýden keıin balany aýrýhanaǵa jatqyzý týraly sheshim qabyldap, zańdy ókiliniń kelisimin rásimdeý úshin kútken.
Belgili bolǵandaı, aýrýhanaǵa túsken kezde balanyń janynda kámeletke tolmaǵan ápkesi bolǵan. Keıin anasy kelgen soń, onyń jáne dárigerdiń arasynda túsinispeýshilik týyndap, arty janjalǵa ulasqan.
Basqarma ókilderi medıtsına qyzmetkerleri qoldanystaǵy talaptarǵa sáıkes áreket etip, balaǵa qajetti medıtsınalyq kómekti tolyq kólemde kórsetkenin málimdedi.
Oqıǵaǵa qatysty Almaty polıtsııa departamenti de túsinik berdi.
Vedomstvonyń habarlaýynsha, bul derek boıynsha Alataý aýdandyq polıtsııa basqarmasyna qarasty bólim tekserý júrgizip jatyr. Qazir eki tarap ta polıtsııaǵa aryz túsirgen.
— Oqıǵanyń barlyq mán-jaıy jan-jaqty zertteledi. Ár taraptyń áreketine Qazaqstan Respýblıkasynyń zańnamasyna sáıkes quqyqtyq baǵa beriledi, — dep habarlady Almaty polıtsııa departamentiniń baspasóz qyzmeti.
Eske salaıyq, buǵan deıin Prezıdent Qasym-Jomart Toqaev medıtsına qyzmetkerlerin quqyqtyq qorǵaýdy kúsheıtý týraly zańǵa qol qoıǵanyn habarlaǵanbyz.
