Almatylyq arheologtar saq dáýirine tıesili altyn júzik tapty
ASTANA. KAZINFORM - Ál-Farabı atyndaǵy QazUÝ-dyń arheologııalyq ekspedıtsııasy saq dáýirine jatatyn altyn áshekeılerdi tapty.
Tarıh fakýltetiniń dekany, professor Dosbol Baıǵonaqovtyń jetekshiligimen Almaty oblysynyń Uıǵyr aýdanynda qazba jumystary júrgizildi.
Toǵyzbulaq aýylynyń mańynda erte temir dáýirine jatatyn qorǵandar zertteldi. Mamandar aýyldyń ońtústik bóliginde ornalasqan jáne 20-dan astam qorǵannan turatyn Toǵyzbulaq-1 jáne Toǵyzbulaq-2 qorymdarynda dalalyq zertteýler júrgizdi. Arheologııalyq nysandardyń negizgi bóligi tizbektele ornalasqan jáne soltústikten ońtústikke baǵyttalǵan elıtalyq qorǵandarǵa jatady. Toǵyzbulaq-2 qorymy aýyldyń soltústiginde ornalasqan jáne jalpy sany 30-dan asatyn túrli qorǵandardan turady.
Tarıh ǵylymynyń doktory, professor Dosbol Baıǵonaqovtyń aıtýynsha, Toǵyzbulaq-1 qorymyndaǵy dalalyq zertteýler barysynda tórt qorǵan, al Toǵyzbulaq-2 qorymynda eki arheologııalyq nysan qazyldy. Toǵyzbulaq-1 qorymyndaǵy №3 jáne №4 qorǵandardyń úıindisinen altyn áshekeılerdiń tabylýy aıtýly jańalyq boldy. №4 qorǵannan er men áıeldiń súıekteri tabyldy. Súıek qaldyqtarynyń janynan keramıkalyq ydystar, temir zattar, tas kelsap, janýarlar súıekteri, altyn tizbektiń synyǵy, ártúrli altyn plastınalar jáne t.b. tabyldy.
- №3 qorǵannyń úıindisinen adamnyń súıek qaldyqtary, sondaı-aq altyn plastınalar tabyldy. Olardyń arasynda arystannyń sýreti salynǵan altyn júzik erekshelenedi. Mundaı artefaktiler sırek kezdesedi. Salmaǵy 8 gramǵa jýyq júzik altyn quımasynan jasalǵan. Júziktegi arystannyń beınesi sınkretızmmen tyǵyz baılanysty. Bir qaraǵanda áıeldiń júzin, arystannyń tumsyǵy men jalyn, tipti buqany, qoshqardy kórýge bolady, olardyń tańbasy ejelgi taıpalarda keń taraǵan, - deıdi Dosbol Baıǵonaqov.
Mamandardyń aıtýynsha, mundaı jerleý oryndary men artefaktiler Qazaqstan aýmaǵynda mekendegen saq taıpalaryna tán. Tabylǵan qazbalar shamamen b.z.d. IV-III ǵasyrlarǵa jatady.
Toǵyzbulaq-1 jáne Toǵyzbulaq-2 qorymdarynan tabylǵan zattar erte temir dáýirimen merzimdeledi jáne qazirgi Uıǵyr aýdanynyń aýmaǵy saq mádenıeti ortalyqtarynyń biri bolǵanyn dáleldeıdi.
Aıta keteıik, sheteldegi qazaq jádigerleriniń katalogi jasalady.