Almatylyq ár júrgizýshige tegin turaq orny berilýi múmkin
ALMATY. KAZINFORM — Almatyda aqyly turaqtar júıesin reformalaý josparlanyp otyr. Bul týraly jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev aıtty.
Onyń sózinshe, qazir rezıdenttik abonement júıesin engizý múmkindigi qarastyrylyp jatyr. Bul bastama boıynsha jergilikti turǵyndar úılerine jaqyn aqyly turaqtarǵa kólikterin tegin qoıa alady.
— Eger turǵynnyń ózi páteri men kóligi bolsa, oǵan turaqtan bir oryn tegin beriledi. Al eger páter jaldaýshy bolsa, bul derek tirkelýi tıis. Mysaly, sol mekenjaıda turatynyn dáleldeýi kerek. Bul jumysty Ádilet organdary arqyly mindetti túrde pysyqtaımyz. Osy jospar boıynsha bir páterge bir tegin oryn bólinedi, — dedi Erjan Dıhanbaev.
Ol rezıdenttik abonement jobasy aqyly turaqtar júıesin odan ári damytýdyń jáne qaladaǵy kólik júktemesin retteýdiń bir bóligi ekenin atap ótti.
Eske salaıyq, buǵan deıin Almaty ákimdigi kópqabatty avtoturaq jobasynan bas tartqanyn jazǵanbyz.
