Almatyǵa ushyp shyqqan Air Astana ushaǵy Fýkýok áýejaıyna oraldy
ALMATY. KAZINFORM — Air Astana Fýkýok — Almaty reısiniń keshigýine qatysty túsinik berdi.
26 jeltoqsan kúni Fýkýok — Almaty baǵytyndaǵy KC 162 reısin oryndaǵan Air Astana áýe kemesi barlyq dárethananyń isten shyǵýyna baılanysty ushyp shyqqan áýejaıǵa oraldy.
Áýe kompanııasynyń málimetinshe, ushaq jergilikti ýaqyt boıynsha saǵat 10:04–te áýege kóterilip, 14:14–te Fýkýok áýejaıyna aman-esen qonǵan.
Qazirgi ýaqytta áýe kemesindegi tehnıkalyq aqaýlardy joıý jumystary júrgizilip jatyr. Osyǵan baılanysty reıstiń ushýy 27 jeltoqsanǵa, jergilikti ýaqyt boıynsha 04:00–ge deıin keıinge qaldyryldy.
— Jolaýshylarǵa ystyq tamaq pen sýsyndar usynyldy. Áýe kompanııasy jolaýshylardy qonaq úıge jetkizý jáne ornalastyrý máselelerimen aınalasyp jatyr, — delingen habarlamada.
Eske salaıyq, buǵan deıin Lufthansa áýe kompanııasynyń ushaǵy Almatyǵa shuǵyl qonýǵa májbúr bolǵanyn habarlaǵanbyz.
Qazaqstannyń avıatsııalyq ákimshiliginiń málimetinshe, ushaqta jolaýshynyń jaǵdaıy kenetten nasharlap, ol esinen tanyp qalǵan. Áýe kemesiniń ekıpajy Almaty halyqaralyq áýejaıyna shuǵyl qoný týraly sheshim qabyldaǵan.
