Almatyǵa óńirlerden patrýldik polıtseıler ne úshin bardy – ІІM jaýaby
ASTANA. KAZINFORM – QR Іshki ister mınıstriniń birinshi orynbasary Baýyrjan Álenov Almatyǵa óńirlerden barǵan patrýldik polıtseıler qandaı jumystardy atqaratynyn túsindirdi.
Aıta keteıik, birneshe kúnnen beri áleýmettik jelide Almatyǵa birneshe óńirden, ıaǵnı Astanadan, Aqmola, Qaraǵandy jáne Jambyl oblystarynan polıtsııa kólikteri baryp jatqany jaıynda vıdeo taraǵan edi.
Osy oraıda búgin Senat otyrysynan keıin tilshiler mınıstrdiń birinshi orynbasarynan atalǵan polıtseıler Almatyda qandaı jumystarmen aınalysatynyn surady.
- Bul sheshim josparly is-sharalar aıasynda qabyldandy. Mundaı jumystardy Astanada jáne basqa da óńirlerde júzege asyrǵan edik. Qazir endi Almatyǵa polıtseılerdi jiberdik. Olar birinshi kezekte jol erejesine, qoǵamdyq tártipti baqylaýǵa nazar aýdarady, - dedi Baýyrjan Álenov.
Osy oraıda ol óńirlerden polıtseılerdi jiberý Almatyda jappaı qýdalaý nemese jazalaýdy bildirmeıtinin atap ótti. Belgili bir ýaqyt ishinde atalǵan josparly is-sharalar aıaqtalǵannan keıin, bul polıtseıler óz oblystaryna qaıtarylady.
Eske salaıyq, 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Keıin Almaty qalasy polıtsııa departamentiniń bastyǵy Aıdyn Qabduldınov rezonans týdyrǵan jol-kólik oqıǵasyna qatysty pikir bildirdi.
Іshki ister mınıstri Erjan Sadenov Almatyda bolǵan adam ólimine ákelgen jol-kólik oqıǵasyna qatysty pikir bildirip, jaǵdaıdyń erekshe baqylaýda ekenin atap ótti.
