Almatyǵa onkologııalyq em alý úshin qaı elderdiń azamattary kelip jatyr

ALMATY. KAZINFORM — Qazaq onkologııa jáne radıologııa ǵylymı-zertteý ınstıtýtynyń hımıoterapııa bólimshesiniń meńgerýshisi Qaldygúl Smaǵulovanyń aıtýynsha, Almatyǵa medıtsınalyq kómek alý úshin Qyrǵyzstannan, Ózbekstannan, Ázerbaıjan men Reseıden de kele bastaǵan. Sheteldikter munda negizinen keshendi dıagnostıkadan ótip, jan-jaqty em alady.

— Qazaq onkologııa jáne radıologııa ǵylymı-zertteý ınstıtýtynyń deregine toqtalsaq, 2025 jyly bizde shamamen 500-ge jýyq sheteldik azamat dıagnostıka men em qabyldaǵan. Bul kórsetkish jyl saıyn ósip kele jatyr, — deıdi Qaldygúl Smaǵulova Óńirlik kommýnıkatsııalar qyzmetinde ótken brıfıng kezinde.

Ol naýqastardyń sáýlelik terapııa, isikke qarsy dárilik terapııa, sondaı-aq hırýrgııalyq emniń jekelegen túrin alý úshin keletinin naqtylady. Mamandardyń aıtýynsha, Almatyda onkologııalyq kómektin tolyq tsıkli bolǵandyqtan jáne osy zamanǵy medıtsınalyq tehnologııalardyń kómegimen emdeıtindikten, suranys ta artypty.

Qazaq onkologııa jáne radıologııa ǵylymı-zertteý ınstıtýty basqarma tóraǵasynyń orynbasary Aısha Moldasheva medıtsınalyq týrızmniń damýy zamandyq onkologııalyq kómektiń sapasy men qoljetimdiligine tikeleı baılanysty ekenin atap ótti. Onkologııalyq aýrýlar týraly eń keń taraǵan mıfterdiń biri — qaterli isikti úkim retinde qabyldaý ekeni aıtady.

— Qazir qaterli isiktiń barlyq túrin emdeıdi, olar barǵan saıyn basqarylatyn sozylmaly jaǵdaılar sanatyna ótip jatyr. Qazirgi zamanǵy onkologııa — bul joǵary tehnologııalyq hırýrgııalyq em, dál sáýlelik terapııa, sondaı-aq hımıoterapııa, sonyń ishinde ımmýndyq-onkologııalyq jáne nysanaly dárilik terapııa, — dedi Aısha Moldasheva.

Eske salaıyq, buǵan deıin elimizde bir jylda 43 myńnan astam adamnan qaterli isik anyqtalǵanyn habarlaǵan edik. Qazir el boıynsha qaterli isikpen ómir súrip jatqan adamdar sany 246 myńnan asty. Bul aldyńǵy jylmen salystyrǵanda 6,6% kóp.