Almatyǵa Omannan evakýatsııalanǵan 300-den astam qazaqstandyq ushyp keldi
ALMATY. KAZINFORM – Almaty halyqaralyq áýejaıyna Oman elinen arnaıy reıspen otandastarymyz ushyp keldi. Bul týraly Almaty qalasynyń óńirlik kommýnıkatsııalar qyzmeti habarlady.
Almaty – Maskat – Almaty baǵyty boıynsha ushqan Boeing 767 ushaǵy elge 314 adamdy, sonyń ishinde balaly otbasylardy jetkizdi. Ekinshi reıspen taǵy 230 otandasymyz kele jatyr. Jolaýshylardy áýejaıdyń kútý zalynda týǵan-týystary kútip aldy.
- Ushaq Almatyǵa qonǵanda ishimdegi qýanyshty sózben aıtyp jetkizý múmkin emes. Bizdi qıyndyqta qaldyrmaǵandaryńyz úshin óte rızamyz, — dedi balalarymen birge ushyp kelgen jolaýshylardyń biri.
Elge oralǵan otandastarymyzdyń aıtýynsha, arnaıy reıs uıymdastyrý týraly sheshim olar úshin qıyn sátte úlken demeý bolǵan. Adamdar dıplomatııalyq qyzmet pen kólik vedomstvolaryna alǵysyn bildirdi.
Eske salaıyq, buǵan deıin Atyraý qalasyna Saýd Arabııasynyń Medına qalasynan ushyp kelgen charterlik reıs qondy.