Almatyǵa Qytaıdyń Sıan qalasynan týrıstik poıyz keldi
ALMATY. KAZINFORM — Almaty-2 temirjol vokzalyna Qytaıdan kelgen «Sıan-Almaty» baǵytyndaǵy alǵashqy halyqaralyq týrıstik poıyz kelip jetti.
Qalanyń temirjol vokzalynda Qytaıdan kelgen týrısterdi saltanatty túrde qarsy alý rásimi ótti.
Jalpy poıyz 9 vagonnan quralǵan. Týrıstik delegatsııa quramynda 246 adam bar. Olardyń qatarynda kásipkerler, ǵalymdar, mádenıet pen sport salasynyń tanymal ókilderi bar. Qytaılyq qonaqtar bes kún boıy elimizdiń ońtústik astanasynyń tarıhı-mádenı erekshelikterimen tanysyp, túrli sharalarǵa qatysady.
— Byltyr Qytaıdan kelgen týrısterdiń sany 700 myńǵa deıin jetip, 2019 jylmen salystyrǵanda 9 esege artqan. Tek 2024 jyly elimizdiń qonaqúılerine 200 myń qytaılyq týrıst kelgen. Ótken jyl Qytaıdaǵy Qazaqstan týrızm jyly jarııalanǵan bolatyn. Al bıyl Qazaqstandaǵy Qytaı týrızminiń jyly. Bul poıyz eki el arasyndaǵy baılanysty nyǵaıtatyn turaqty marshrýtqa aınalyp, jańa bastamalarǵa jol ashady dep senemin, — dedi Týrızm ındýstrııasy komıtetiniń tóraǵasy Nurtas Káripbaev.
Týrıstik poıyz Úrimji qalasy arqyly ótip, Qorǵas halyqaralyq shekara beketinde toqtaǵan. Onda poıyzdyń dóńgelek juptary aýystyrylyp, odan ári poıyz Altynkól stantsııasy arqyly Almaty qalasyna kelip jetken.
— Bul joba eki jyl boıy daıyndalyp, Qytaı men Qazaqstan basshylyǵynyń erekshe nazarynda boldy. Daıyndyq barysynda kólik, mádenıet jáne týrızm, temirjol, shekara qyzmetiniń qyzmetkerleri orasan zor eńbek etti. Sondyqtan barlyq taraptarǵa alǵys bildiremin. Alysty jaqyn etken temirjol — shyǵys pen batysty jalǵaıtyn kópir ispetti. 2025 jyly Qytaı týrızminiń jyly. Endigi kezekte osy poıyz Qytaı men Ortalyq Azııa elderi arasynda týrıstik yntymaqtastyqtyń jańa kezeńin ashatynyna senemin, — dedi Qytaıdyń Almatydaǵy bas konsýly Tszıan Veı.
Eske salaıyq, buǵan deıin Qytaıdyń qaq ortasyndaǵy Sıan qalasynan Almatyǵa týrıstik poıyz kele jatqanyn jazǵanbyz.
Byltyr Qazaqstan men Ózbekstan arasyda qatynaıtyn Jibek Joly týrıstik poıyzy iske qosyldy.