Almatyǵa Azııa oıyndarynyń júldegerleri oraldy

ALMATY. KAZINFORM – Azııa oıyndarynda baq synaǵan Ulttyq qurama músheleriniń alǵashqy delegatsııasy elge oraldy.

Almatylyqtar megapolıstiń halyqaralyq áýejaıynda IX qysqy Azııa oıyndarynyń chempıony ári kúmis júldegeri Sherzod Hashırbaevty, kúmis júldeger Evgenıı Koshkın, kúmis ári eki márte qola júldeger Aıana Joldas, kúmis júldeger Asylhan Asan, qola júldeger Ardana Mahanova jáne qola júldeger Krıstına Sılaevany saltanatty túrde qarsy aldy.

- Harbınge daıyndyǵymyz Avstrııadan bastaldy. Odan ári Almatyda daıyndalyp, Amerıkaǵa álem kýbogynyń kezeńine qatystyq. Sosyn birden osy Azıadaǵa jol júrdik. Eldiń qoldaýyn jaqsy sezindim. Bizge Qytaıda taý, traplın, aýa raıy - bári unady. Nátıjesi bir altyn jáne bir kúmis. Endi alda álem kýbogynyń etaptary bar. Olar Almatyda, Qytaıda jáne Italııada ótedi. Bul jarystarǵa qatysyp, jaqsy nátıje kórsetýge tyrysamyz, - dedi frıstaıl-akrobatıkadan Azııa oıyndarynyń chempıony Sherzod Hashırbaev.

Eske salaıyq, buǵan deıin qazaqstandyq sportshylardyń Azııa oıyndaryndaǵy búgingi nátıjesi týraly jazǵanbyz.