Almatyǵa kelgen sheteldik týrısterdiń sany pandemııaǵa deıingi kezeńnen asyp tústi
ALMATY. KAZINFORM - Ulttyq statıstıka bıýrosynyń málimetinshe, 2023 jyly Almatyǵa kelgen týrısterdiń jalpy sany 2 038 417 adamdy qurady, bul 2022 jylmen salystyrǵanda 12,6%-ǵa jáne pandemııa aldyndaǵy 2019 jylǵy deńgeıden 52,7%-ǵa artyq.
«Sheteldik týrıster sanynyń 2022 jylmen salystyrǵanda ósimi 29,5%-dy (540 744 adam) qurady. Bul Almatynyń Qazaqstannyń basqa qalalary arasynda kóshbasshy ekenin aıqyndap otyr. 2019 jylmen salystyrǵanda qaladaǵy sheteldik týrıster sany 24,1%-ǵa ósken. Týrızm salasynda jumyspen qamtylǵandar sany 10,4%-ǵa ósip, 80 983 adamdy nemese Almaty qalasynyń jalpy jumys isteıtin halqynyń 7,7%-yn qurady. Týrızm salasyna tartylǵan ınvestıtsııa ósimi 47,7%-ǵa nemese 106,4 mlrd teńgege jetti, bul negizgi kapıtalǵa salynǵan ınvestıtsııanyń jalpy kóleminiń 6%-y. Ótken jyly Almaty qalasynyń týrızm sektoryndaǵy salyq túsimderi 64%-ǵa ósip, 71,7 mlrd teńgeni qurasa, jergilikti bıýdjettiń jalpy salyqtyq túsimderindegi úlesi 5%-ǵa jetti», - delinedi habarlamada.
Almaty qalalyq týrızm basqarmasynyń málimetinshe, kórsetkishterdiń ósýi Almatynyń týrıstik baǵyt retinde tartymdylyǵynyń artqanyn kórsetedi. Óz kezeginde týrıstik qyzmetter men ınfraqurylymǵa suranystyń artýy týrızm salasyna ınvestorlar tartýǵa, jańa jumys oryndaryn qurý men sapaly qyzmet kórsetý úshin jaqsy kórsetkish sanalady.
«2023 jyly týrızmdi damytýǵa jergilikti bıýdjetten 2,1 mlrd teńge bólindi. Bul rette jumsalǵan 1 teńge salyq túrinde bıýdjetke 34,14 teńge kóleminde qaıtaryldy, bul týrızm salasynyń qala ekonomıkasyna qosqan oń úlesi men tıimdiligin kórsetedi. Sońǵy 5 jylda Almatyda 1 345 nómiri bar 12 qonaqúı ashyldy, onyń ishinde jelilik qonaqúıler de bar (Hilton, Accor jáne InterContinental). 2027 jyly bólmeler sanyn 1,5 ese ulǵaıtyp, 17 myń bólmege jetkizý josparlanýda. Bıylǵy jyldyń maýsym aıynda Almaty halyqaralyq áýejaıynda eki ese kóp kelýshilerdi (14 mln adamǵa deıin) qabyldaýǵa múmkindik beretin jańa jolaýshylar termınalyn iske qosý kútilýde», - dep habarlady qalalyq týrızm basqarmasy.
Eske salsaq, Almatyǵa qaı elderden týrısterdiń jıi keletinin habarlaǵanbyz.
