Almatyǵa «Qaırat» – «Real Madrıd» matchyna 5 myńnan asa týrıst keldi

ASTANA. KAZINFORM — Almatyda ótetin «Qaırat» — «Real Madrıd» matchyn tamashalaý úshin 26-29 qyrkúıek aralyǵynda 5 myńnan astam sheteldik qonaq kelgeni anyqtaldy.

Qazaqstannyń ózge óńirlerinen kelgen jankúıerlermen birge jalpy kórermen sany ondaǵan myń adamǵa jetti. Bul týraly Almaty qalasy Týrızm basqarmasy «e-Qonaq» aqparattyq júıesiniń derekterine silteme jasap habarlady.

Negizgi týrıster legi Qytaı, Úndistan, Reseı, Qazaqstannyń basqa oblystarynan, sondaı-aq Japonııa, Ulybrıtanııa, Ispanııa, Chehııa, TMD jáne ózge de Eýropa memleketterinen kelgen.

Matchtyń ekonomıkalyq áseri aıtarlyqtaı joǵary bolmaq. Mastercard kompanııasynyń málimetinshe, Almatyǵa kelgen sheteldik týrıstiń ortasha shyǵyny shamamen 1 500 AQSh dollaryna jetedi.

— Bul qarjyǵa qonaq úıde turý, tamaqtaný, kólik, oıyn-saýyq pen saýda kiredi. Mundaı shyǵyndar shaǵyn jáne orta bıznestiń damýyna serpin berip, qyzmet kórsetý salasyn jandandyrady ári qala ekonomıkasyna mýltıplıkatıvti áser etedi, — delingen habarlamada.

Budan buryn UEFA Chempıondar lıgasy negizgi kezeńi ekinshi týryndaǵy qazaqstandyq «Qaırat» jáne Ispanııanyń «Real Madrıd» komandalary arasyndaǵy kezdesýde qaı eldiń tóreshileri qyzmet atqaratyny belgili boldy.