Almatyǵa qaı elderden týrıster jıi keledi

ALMATY. KAZINFORM – Almaty Qazaqstanǵa kelgen árbir ekinshi sheteldik týrısti qyzyqtyrady. Bul týraly óńirlik kommýnıkatsııalar qyzmetinde ótken baspasóz máslıhatynda qalalyq týrızm basqarmasynyń basshysy Ǵalııa Toqseıitova málimdedi.

Ulttyq statıstıka bıýrosynyń málimetinshe, 2023 jyldyń 9 aıynda týrısterdiń jalpy sany 1,5 mln adamnan asqan (ósim — 17,5%). 

Onyń ishinde sheteldik týrıster sany 51,5% artyp, 410 myń adamǵa jetti.

Osylaısha megapolıs sheteldik týrısterdi qabyldaıtyn Qazaqstan qalalary arasynda kóshbasshy boldy.

«Týrıster aǵynynyń artýy esebinen týrızm salasyndaǵy negizgi kórsetkishterdiń aıtarlyqtaı ósimine qol jetkizdik. Mysaly, salyq túsimi 64% ulǵaıyp, 50,2 mlrd teńge boldy. Jumyspen qamtylǵandar sany 11% nemese 78 551 adamǵa artty. Investıtsııa 47,7% nemese 106,4 mlrd teńgege ósti», — dedi Ǵalııa Toqseıitova.

Byltyr Reseı, Qytaı, Úndistan, Túrkııa jáne AQSh-tan kelgen týrıster sany 256 myńnan asqan.

«Almatyǵa kelgen týrısterdiń jalpy sanynyń 60%-y 4 jáne 5 juldyzdy qonaqúılerde (246 256 adam) turady. Bul sheteldik týrısterdiń ál-aýqatynyń joǵary ekenin kórsetedi», — dedi ol.

Sonymen qatar ol sheteldik saıahatshylar negizinen gıdter men týroperatorlardyń qyzmetterin paıdalanatynyn jetkizdi.

«Megapolıste olar Medeý, Shymbulaq, Kóktóbe, Kafedraldyq sobor, Ortalyq memlekettik murajaı, Ortalyq meshit, 28 gvardııashy-panfılovshy saıabaǵy, Kókbazar, Arbat, Ortalyq demalys jáne mádenıet saıabaǵy, Tuńǵysh Prezıdent saıabaǵy, Botanıkalyq baq, Baým toǵaıy, Haıýanattar baǵy sııaqty jerlerdi kórgisi keledi», — dep atap ótti basqarma basshysy.