Almatyǵa qaı elden týrıst kóp keledi

ASTANA. KAZINFORM – Bıyl Almatyǵa 750 myńǵa jýyq sheteldik týrıst keledi dep boljanyp otyr. Bul týraly qala ákimi Erbolat Dosaev Úkimet otyrysynda aıtty.

− Almatyda týrızm salasy qarqyndy damyp keledi. 2024 jyly týrısterdiń jalpy sany 14,8%-ke ósip, 2 mln 340 myń týrıst boldy. Sheteldik týrıster sany 27%-ke aıtarlyqtaı ósip, 680 myńnan asty. Al ishki týrıster sany 10,4%-ke ósip, 1 650 myń adamnan asty. Týrısterge kórsetilgen qyzmet kólemi 30%-ke artyp, 96,3 mlrd teńgege jetti, − dedi Erbolat Dosaev.

Ákimniń aıtýynsha, Almatyǵa kelýshiler arasynda Úndistan, Qytaı, AQSh, Túrkııa, Ońtústik Koreıa azamattary kósh bastap tur.

Qalada týrızm salasynda 83,5 myń adam jumyspen qamtylǵan, ortasha jalaqy — 480 myń teńge.

− Týrıster sanynyń ósýi negizgi kapıtalǵa salynǵan ınvestıtsııalardyń artýymen qatar júrdi. 2024 jyly 111 mlrd teńge ınvestıtsııa tartylyp, 2,1% ósim kórsetti. Salyq túsimderi 92,1%-ke ósip, bıýdjetke 90,7 mlrd teńge tústi. Bıyl sheteldik týrıster sany 10% ósip, 750 myń adamǵa deıin jetedi dep boljanǵan, − dedi ol.

Sondaı-aq, bıylǵy mamyr aıynda qaladaǵy Almaty Museum of Arts jáne «Tselınnyı» zamanaýı mádenıet ortalyǵynyń qurylysy aıaqtalady.

− Qalanyń negizgi ınfraqurylym nysandaryn jańǵyrtý jalǵasyp jatyr. Bıyl «Medeý» muz keshenin jáne «Ortalyq stadıondy» 35 myń kórermenge deıin ulǵaıtý jáne jańǵyrtý jumystary bastalady. Bul jumystar 2027 jyly aıaqtalady, − dedi Erbolat Dosaev.

Aıta keteıik, sońǵy 5 jylda Qazaqstandaǵy týrıster sany 7,5 ese ósti. Byltyr elimizge 15 mln-nan astam adam saıahattap kelgen.

«Astana Kontsert» kompanııasynyń prodıýseri Málik Hasenov amerıkalyq aktrısa jáne ánshi Djennıfer Lopestiń Astanada ótetin kontsertinen qansha ekonomıkalyq paıda túsetinin aıtty.