Almatyǵa qala kúnine arnalǵan festıvalge 200 tonna alma jetkizildi

Qala ortalyǵynda taqyryptyq alańdar uıymdastyrylyp, qonaqtarǵa fermerlik ónimder, qolóner buıymdary, gastronomııa, mýzyka jáne búkil otbasyǵa arnalǵan túrli oıyn-saýyq túrleri usynyldy.

Festıvaldiń basty erekshelikteriniń biri – alma. Merekege oraı tanymal sorttardan bastap sırek kezdesetin jáne áıgili almatylyq aport, jalpy 200 tonnadan astam alma jetkizildi.

16-Alma Qala festıvali Panfılov pen Qazybek bı kósheleriniń qıylysynda ótip jatyr. Munda Almaty aglomeratsııasynyń fermerlik sharýashylyqtary óz ónimderin tanystyrady. Kelýshiler almanyń túrli sorttarynan dám tatyp, satyp ala alady.

Festıval 10 taqyryptyq aımaqqa bólingen. Ulttyq aımaqta folklorlyq ujymdar, etnıkalyq ansamblder men kúı oryndaýshylary óner kórsetedi. Teatr sahnasynda Almaty teatrlary spektaklder qoıyp, balalarǵa arnalǵan qoıylymdar men ádebı oqýlar uıymdastyryldy.

Kishkentaı qonaqtarǵa da arnaıy alań qarastyrylǵan. Munda anımatorlar jumys istep, túrli oıyndar men shyǵarmashylyq sheberlik sabaqtary ótedi.

Qolónershiler aımaǵynda 50-den astam óndirýshi men shyǵarmashylyq kásipker óz buıymdaryn usynyp jatyr. Kelýshiler sheberlerdiń jumystaryn tamashalap qana qoımaı, toqý, sýret salý, músindeý, aǵash oıý jáne áshekeı buıymdar jasaý boıynsha ózderin synap kóre alady.

Festıvaldiń gastronomııalyq bóliginde jergilikti óndirýshilerdiń ónimderi usynylǵan. Sórelerde tosap, djem, pastıla, keptirilgen jemister, alma chıpsteri, bal, qurt jáne basqa da jergilikti ónimder bar.

Jeke alań tsıfrlyq tehnologııalarǵa arnalǵan. Munda Almatynyń tsıfrlyq mýzeıi jasalyp, tehnologııalardyń damýymen birge qalanyń qalaı ózgerip jatqany týraly aqparat beriledi.

Uıymdastyrýshylar ekologııalyq máselelerge de nazar aýdarǵan. Eko-aımaqta kelýshilerge qaldyqtardy suryptaý jáne qaıta óńdeý, sondaı-aq «Taza Qazaqstan» baǵdarlamasy aıasyndaǵy qalalyq ekologııalyq bastamalar týraly aıtylady. Janynda onnan astam uıym qatysatyn volonterler stantsııasy jumys isteıdi.

Mýzykalyq baǵdarlama da merekeniń mańyzdy bóligine aınaldy. Festıvaldiń alǵashqy kúninde qonaqtar aldynda Alı Oqapov, Mádı Rymbaev, Nurǵalim Amanbaı, Nurmuhammed Jaqyp, Akerke Amalıat, Kárim Mýtýrǵanov, Jas-Muqasan jáne ILIGAI óner kórsetti.

Alma Qala festıvali 20 qyrkúıekke deıin jalǵasady. Kelýshilerdi ártisterdiń óner kórsetýi, taqyryptyq alańdar, jergilikti óndirýshilerdiń jármeńkesi jáne Qala kúnine arnalǵan merekelik baǵdarlama kútedi.

Qalanyń negizgi alańdaryna kirý tegin.

Eske salaıyq, buǵan deıin Almatyda qala kúni qalaı atap ótiletinin habarladyq.