Almatyǵa eń kóp týrıst Úndistannan, Italııadan, Qytaıdan keledi
ASTANA. KAZINFORM – Ótken jyly Almaty qalasyna saıahattaǵan týrıster sany 12,6% ósip, 2 mln adamnan asty. Bul týraly megapolıs ákimi Erbolat Dosaev Úkimet otyrysynda baıandady.
«Sheteldik týrıster sany 30% deıin ósip, 540 myń adamǵa jetti. Bul kósretkishter pandemııaǵa deıingi deńgeıge qaraǵanda 24,1% deıin joǵary. Ótken jyly Almatyda týrıstik aǵynnyń eń kóp ósýi Úndistannan, Italııadan, Ońtústik Koreıadan, Qytaı, Ulybrıtanııa jáne AQSh-tan baıqaldy», - dedi Almaty ákimi.
Іshki týrıster sany 7,6% ósip, 1,4 mln adam boldy. Bul oń dınamıka týrızm salasyna salynǵan ınvestıtsııalardyń 47,7% - 106,4 mlrd teńgege deıin jáne salyq túsimderiniń 64% - 71,8 mlrd teńgege deıin ósýimen qatar júrdi. Sondaı-aq, týrıstik salada jumyspen qamtylǵandar sany 10% ósip, 81 myńnan astam adamǵa jetti.
Týrıstik aǵynnyń ósýi 2024 jyly da jalǵasyp jatyr. Mastercard málimetinshe, osy jyldyń birinshi jartyjyldyǵynda Almatyǵa keletin sheteldik jolaýshylar 30% artýy múmkin.
«Áýe kompanııalary ushý jıiligi men ushaq syıymdylyǵyn arttyryp jatyr. 2024 jyly bes jańa baǵyt ashylyp, 14 naýryzda Almaty men Kýala-Lýmpýr tikeleı áýe qatynasy iske qosyldy. Búgingi tańda megapolıs álemniń 41 qalasymen tikeleı áýe qatynasyn ornatqan», - dedi E.Dosaev.
2024 jyldyń maýsym aıynda Almaty halyqaralyq áýejaıynyń jolaýshylar aǵynyn 14 mln adamǵa deıin ulǵaıtatyn jańa termınaly ashylady. Sondaı-aq, 2024 jyly Almaty áýejaıynda jolaýshylar aǵyny 11 mln adamǵa deıin asady dep josparlanǵan.
