Almatyǵa Djennıfer Lopestiń kontsertin tamashalaýǵa 29 elden kórermen keledi

ALMATY. KAZINFORM – 10 tamyz kúni Almatynyń Ortalyq stadıonynda álemge tanymal juldyz Djennıfer Lopes óner kórsetedi. 

Uıymdastyrýshylardyń aıtýynsha, bul aýqymdy is-shara qalanyń jáne týrıstik salanyń damýyna eleýli úles qosady.

«Astana Kontsert» kompanııasynyń prodıýseri Málik Hasenovtyń sózinshe, kontsert halyqaralyq deńgeıde úlken qyzyǵýshylyq týdyrdy – bıletterdi Reseı, Qyrǵyzstan, Ózbekstan, Tájikstan, AQSh, Ulybrıtanııa, Germanııa, BAÁ, Saýd Arabııasy, Shveıtsarııa, Qytaı, Túrkııa, Meksıka jáne basqa elderdi qosa alǵanda, 29 eldiń turǵyndary satyp aldy.

– Bul eldegi eń tartymdy týrıstik qalalardyń biri – Almaty úshin mańyzdy oqıǵa jáne týrızminiń draıveri, - dedi Málik Hasenov.

Onyń aıtýynsha, bıletterdiń 30 paıyzyn (shamamen 8 000 adam) sheteldikter satyp alǵan. Almaty qalasynyń týrızm basqarmasynyń zertteýine sáıkes, árbir sheteldik týrıst qalada orta eseppen 3-ten 5 kúnge deıin bolyp, jalpy 1500 AQSh dollar kóleminde qarajat jumsaıdy.

– Eger 8 myń týrıst bir mezette kelip, osy somany jumsasa, qonaqúıler, meıramhanalar, dámhanalar, ekskýrsııalar men áýe bıletteri arqyly qala ekonomıkasyna túsetin tabys shamamen bes mıllıard teńgege jetedi, - dep atap ótti ol.

Prodıýser bılet quny qalaı qalyptasatynyn jáne nege mundaı deńgeıdegi is-shara úshin bul baǵanyń qoljetimdi ekenin de túsindirdi. Baǵalar 40 myńnan 180 myń teńgege deıingi aralyqta, sonyń ishinde eń qymbat oryndar satylyp ketti. Bılet baǵasynyń ortasha quny – 90 myń teńge.

– Baǵalar kontserttik týrdyń ózindik qunyna baılanysty esepteledi. Bul – 14 elde ótetin aýqymdy álemdik týr. Árbir baǵa týr-menedjermen kelisilgen. Eń bastysy, bul jobada memlekettik bıýdjetten birde-bir teńge jumsalǵan joq – bul tolyǵymen kommertsııalyq shara, barlyq salyq tólenedi, - dedi spıker.

Sondaı-aq ol Astanada barlyq bılet nebári úsh saǵat ishinde satylyp ketkenin tilge tıek etti. Almatyda qazir shamamen 2 500–3 000 bılet qaldy — olar turyp tamashalaıtyn oryndar, fan-aımaq pen bı alańy.

– Bul Qazaqstan naryǵy álemdik deńgeıdegi sharalardy ótkizýge daıyn ári jetilgenin kórsetedi, - dep qorytyndylady sózin spıker.

Djennıfer Lopestiń kontserti Almaty qalasyna aıtarlyqtaı ekonomıkalyq paıda ákeledi. Tek salyq túsimderiniń ózinen qalalyq bıýdjetke shamamen 400 mln teńge túsedi dep kútilip otyr.

«First Media Group» kompanııasynyń basshysy Alfııa Nurǵumarovanyń aıtýynsha, Almaty úshin barlyǵy 25 myń bılet qarastyrylǵan.

Eske salaıyq, buǵan deıin prodıýser Málik Hasenov Djennıfer Lopes 10 tamyz kúni Almatynyń Ortalyq stadıonynda jeke kontsertin ótkizetinin aıtqan edi. 

Keıin «Qaırat» fýtbol klýby bul is-sharaǵa kelisim bermegenin habarlady. 

Artynsha, Almatyda 10 tamyzda «Qaırat» – «Jeńis» oıyny emes, Djeı Lonyń kontserti ótetini belgili boldy. 

Aıta keteıik, amerıkalyq aktrısa jáne ánshi Djennıfer Lopes týr aıasynda Qazaqstanda eki kontsert ótkizedi.