Almatyǵa bıyl 1,7 mıllıonnan astam týrıst keldi

ALMATY. KAZINFORM – 2024 jyldyń toǵyz aıynda Almatyǵa 1,7 mıllıonnan astam týrıst keldi. Bul týraly máslıhat sessııasy barysynda aıtyldy. 

QR Ulttyq statıstıka bıýrosynyń derekteri boıynsha, 2024 jyldyń qańtar-qyrkúıek aıy aralyǵynda Almatyda týrıster sany 14,2%-ǵa artyp, 1 729,6 myń adamǵa jetti. Onyń ishinde sheteldik týrıster sany 24%-ǵa ósip, 507,6 myń adamdy qurady, al ishki týrıster sany 10,6%-ǵa artyp, 1 222 myń adamǵa jetti. 

– Týrıstik salanyń belsendi damýy ınvestıtsııalardyń aıtarlyqtaı ósýimen qatar júrdi. 2024 jyldyń 10 aıynda ınfraqurylymdy jaqsartýǵa, jańa obektilerdi qurýǵa jáne servıs sapasyn arttyrýǵa salynǵan ınvestıtsııalar kólemi 86,6 mlrd teńge. Bul ótken jyldyń kórsetkishterinen 29,3%-ǵa artyq. Týrızm salasynan túsetin salyq túsimderi 2 esege artyp, 76,9 mlrd teńgege jetti, - dep atap ótti sala mamandary.

Halyqaralyq týrıstik kórmelerde Almaty sheteldik týroperatorlarmen 230 memorandýmǵa qol qoıdy, bul aldaǵy úsh jylda 190 myńnan astam týrıstiń kelýin qamtamasyz etedi. Kútiletin ekonomıkalyq tıimdilik – 285 mln AQSh dollary. 

Negizinen Reseı, Úndistan, Qytaı, Túrkııa, Germanııa, AQSh azamattary Almatyny kórýge nıetti. 

Osyǵan deıin Týrızm basqarmasynyń basshysy Ǵalııa Toqseıitova salasyndaǵy problemalar men olardy sheshý joldary týraly aıtqan bolatyn.