Almatyǵa baǵyt alǵan ushaq ishinde dáret syndyrǵan sheteldik jazalandy

ALMATY. KAZINFORM — Er adam «Phýket — Almaty» baǵyty boıynsha kele jatqan ushaqta tártip buzǵan. 

Kóliktegi polıtsııa departamentiniń málimetinshe, masań kúıdegi Reseı Federatsııasynyń 42 jastaǵy azamaty salondaǵy ornynda dáret syndyrǵan.

Áýe kemesi Almaty áýejaıyna qonǵannan keıin jelilik polıtsııa bóliminiń qyzmetkerleri ushaq bortyndaǵy qoǵamdyq tártipti buzǵan jolaýshyny akt boıynsha túsirip, ustaǵan. Ol QR ákimshilik kodeksiniń birden eki baby, ıaǵnı alkogoldik ishimdikter ishý nemese qoǵamdyq oryndarǵa masań kúıinde kelý jáne usaq buzaqylyq boıynsha ákimshilik jaýapkershilikke tartyldy jáne 25 AEK mólsherinde aıyppul arqalady.

— 2025 jyldyń birinshi toqsanynda kóliktegi polıtsııa departamentiniń qyzmetkerleri 21 441 ákimshilik quqyq buzýshylyqty anyqtady. Atap aıtar bolsaq, alkogoldik ishimdikter ishkeni nemese qoǵamdyq oryndarǵa masań kúıinde kelgeni úshin — 1 648, usaq buzaqylyq jasaǵany úshin — 163 fakti tirkeldi, - dep habarlady departamentten. 

Eske salaıyq, buǵan deıin Almaty áýejaıy jolaýshylarǵa eskertý jasaǵanyn jazǵan edik.