Almatyǵa 4 óńirdiń polıtsııa qyzmetkerleri keldi

ALMATY. KAZINFORM – Almatyda «STOP buzýshylyq» aýqymdy operatsııasy bastaldy.

1 sáýirde bastalǵan operatsııa 10 sáýirge deıin jalǵasady. Almaty qalasynyń polıtsııa departamenti is-sharaǵa Astana qalasynan, Aqmola, Qaraǵandy jáne Jambyl oblystarynan qosymsha kúshter tartylǵanyn atap ótti.

Operatsııa quqyq buzýshylyqtardyń aldyn alý tıimdiligin arttyrýǵa, qoǵamdyq tártipti qamtamasyz etýge jáne megapolıstegi jol qozǵalysy qaýipsizdigin nyǵaıtýǵa baǵyttalǵan.

— Polıtsııanyń árbir áreketi zańdy, ashyq ári kásibı bolýy tıis. Bizdiń basty mindetimiz – azamattardyń qaýipsizdigin qamtamasyz etý jáne quqyqtyq tártipti saqtaý, – dedi Almaty qalasy polıtsııa departamentiniń bastyǵy Aıdyn Kabduldınov.

Eske salaıyq, Almatynyń Ál-Farabı dańǵylynda bolǵan jol apaty qoǵamda úlken rezonans týdyrdy. Bıyl 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.

Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.

Keıin Іshki ister mınıstri Erjan Sadenov Almatydaǵy jol apatynan keıin birqatar basshy qyzmetinen bosatylǵanyn málimdedi.