Almatyǵa 149 myń stýdent syrttan keledi: jataqhanalar daıyn ba
ALMATY. KAZINFORM – Almatyda jańa oqý jylyna qaraı stýdentter úshin 61,2 myń jatyn oryn daıyndalady.
Almaty qalasy Jastar saıasaty basqarmasynyń basshysy Azız Kajdenbektiń aıtýynsha, búginde qaladaǵy 35 joǵary oqý ornynda 221 myń stýdent bilim alady, onyń 149 myńy basqa óńirlerden kelgen jastar. Sondyqtan qalada stýdentterge arnalǵan turǵyn úıge degen suranys joǵary.
- Sońǵy bir jylda jataqhanalardaǵy oryn tapshylyǵy tórt esege jýyq qysqardy. Qazir Almatyda 136 stýdenttik jataqhana jumys isteıdi. Onyń 43-i 2023 jyldan beri paıdalanýǵa berilgen, al byltyr rekordtyq 4,5 myń oryn iske qosyldy. Búginde jataqhanalarda 46,2 myń stýdent turady. Bul ótken jylmen salystyrǵanda 6 myńǵa kóp. 2026 jyldyń sońyna deıin qalada taǵy 13 nysandy iske qosý josparlanyp otyr. 1 qyrkúıekke deıin Almatyda jalpy 61,2 myń oryn daıyn bolady, - dedi ol.
Azız Kajdenbek stýdentter qalaǵa kelip jatqan kezeńde keńes berý ortalyqtardyń jumysy kúsheıtilgenin atap ótti. 10 tamyzdan bastap Qazaq ulttyq qyzdar pedagogıkalyq ýnıversıtetiniń bazasynda Bógenbaı batyr kóshesi, 142 mekenjaıynda Ahýaldyq ortalyq jumys isteıdi. Onyń janynda táýlik boıy jumys isteıtin baılanys ortalyǵy bar. Keńes alý úshin myna telefondarǵa habarlasýǵa bolady: +7 700 950 95 28, +7 727 237 01 70.
- Stýdentterge qaı jerde ornalasýǵa bolatyny, jataqhanaǵa qalaı ótinish berý kerektigi, oryn berilmegen jaǵdaıda ne isteý qajettigi jáne qıyn jaǵdaı týyndaǵanda qaıda júginý kerektigi túsindiriledi. Osyndaı ortalyqtar Almatydaǵy barlyq joǵary oqý ornynda jumys isteıdi, - dedi basqarma basshysy.
Odan bólek belgili bir sebeppen baspanasyz qalǵan stýdentterge ýaqytsha turǵyn úı usynylady. 22 tamyzda Máýlenov kóshesi, 108A mekenjaıyndaǵy ALT Ýnıversıtetiniń №1 Stýdentter úıinde 50 oryndyq Daǵdarys ortalyǵy ashylady.
Eske salaıyq, byltyr Almatyda Ahýaldyq jáne Daǵdarys ortalyqtaryna qansha stýdent júgingenin jazǵanbyz.
