«Almatyelektrotrans» eks-basshysyna qatysty tergeý ýaqytsha toqtady

ALMATY. KAZINFORM — Halyqaralyq izdeýde júrgen «Almatyelektrotrans» JShS burynǵy bas dırektory Berikhan Myrzakárimov áli tabylmady. 

Almaty boıynsha ekonomıkalyq tergeý departamenti Qylmystyq kodekstiń 189-baby 2-tarmaǵy 4-bóligi (Senip tapsyrylǵan bóten múlikti ıemdený nemese talan-tarajǵa salý, ıaǵnı asa iri kólemde jymqyrý) boıynsha eks-basshyǵa qatysty qozǵalǵan qylmystyq is boıynsha túpkilikti protsessýaldyq sheshim áli qabyldanbaǵanyn málimdedi.

— Kúdikti B. K. Myrzakárimovke halyqaralyq izdeý jarııalanǵanyna baılanysty sotqa deıingi tergep-tekserý toqtatyldy. QPK-niń 201-babyna sáıkes, sotqa deıingi tergeýdiń ózge derekteri jarııa etilmeıdi, — dedi Almaty boıynsha ekonomıkalyq tergeý departamenti basshysynyń orynbasary Baýyrjan Tilemisov.

Aıta keteıik, Myrzakárimov «Almatyelektrotrans» JShS-in 2021 jylǵy aqpanda basqarǵan, al 2023 jylǵy jeltoqsanda oǵan izdeý jarııalandy.

Al 2025 jylǵy tamyzda Berikhan Myrzakárimov shetelde izdestirilip jatqany habarlandy.