«Almatyelektrotrans» eks-basshysy shetelde izdestirilip jatyr

ALMATY. KAZINFORM - «Almatyelektrotrans» JShS-niń burynǵy bas dırektory Berikhan Myrzakárimov 2023 jyldyń sońynan beri izdestirilip jatyr.

QR Qarjy monıtorıngi agenttiginiń málimetinshe, ol senip tapsyrylǵan múlikti asa iri kólemde ıemdený nemese talan-tarajǵa salý faktisi boıynsha kúdikke ilingen.

— Almaty boıynsha ekonomıkalyq tergep-tekserý departamentiniń óndirisinde Myrzakárimov B.K.-ǵa qatysty QR Qylmystyq kodeksiniń 189-baby 4-bóliginiń 2-tarmaǵy (Senip tapsyrylǵan bóten múlikti ıemdený nemese talan-tarajǵa salý, ıaǵnı asa iri kólemde jymqyrý — red.) boıynsha qylmystyq is bar. Kúdiktige halyqaralyq izdeý jarııalandy. Tergeý múddesine baılanysty basqa aqparat jarııa etilmeıdi, - dep habarlady vedomstvo agenttiktiń resmı saýalyna bergen jaýabynda.

Aıta keteıik, Myrzakárimov «Almatyelektrotrans» JShS-in 2021 jylǵy aqpanda basqarǵan, al 2023 jylǵy jeltoqsanda oǵan izdeý jarııalanǵan.

Byltyr «Almatyelektrotrans» eks-basshysyn izdeý jumystary jalǵasyp jatqany habarlanǵanymen, onyń halyqaralyq izdeýde ekeni aıtylmaǵan edi.