Almatydan Tokıoǵa tikeleı reıs qashan usha bastaıdy
ALMATY. KAZINFORM – 2026 jylǵy naýryzda Air Astana áýe kompanııasy Almaty men Tokıo arasyndaǵy jańa tikeleı áýe qatynasyn iske qosady.
Reıs qarsańynda Japonııanyń jetekshi týroperatorlary Almatyda qazaqstandyq týrıstik ındýstrııa ókilderimen kezdesti.
Mamandardyń aıtýynsha, Almaty – Tokıo tikeleı reısiniń ashylýy Qazaqstan men Japonııa arasyndaǵy týrıstik jáne iskerlik baılanysty jańa deńgeıge shyǵarady.
Aldyn ala boljam boıynsha, reıs iske qosylǵan alǵashqy jyly Japonııadan 5-7 myńǵa deıin týrıst kelýi múmkin.
– Japonııa – Qazaqstan úshin strategııalyq mańyzdy naryq. Bul sapar men bolashaq reıs eki el arasyndaǵy ózara yntymaqtastyq pen qyzyǵýshylyqty jańa deńgeıge kóteredi, - dedi Almaty týrızm basqarmasynyń ókilderi.
Eske salaıyq, buǵan deıin QR Kólik mınıstrligi Azamattyq avıatsııa komıteti tóraǵasynyń orynbasary Darhan Katyshev aldaǵy ýaqytta Qazaqstannan qaı qalalarǵa áýe reısi ashylatynyn aıtyp bergen edi.
