Almatydan sý tasqynynan zardap shekken aımaqtarǵa 592 gýmanıtarlyq kómek jóneltildi

ALMATY. KAZINFORM – Almatyda 29 naýryz ben 15 mamyr aralyǵynda sý tasqynynan zardap shekken qazaqstandyqtar úshin 592 tonna gýmanıtarlyq kómek jınaldy. Kómek kórsetýge qala turǵyndary, kásipkerler men belsendi jastar qatysty. Bul týraly óńirlik kommýnıkatsııalar qyzmetinde Almaty qalasy eriktiler front-keńsesiniń basshysy, «QAMQOR CHARITY» qoǵamdyq qorynyń tóraǵasy Baǵdat Anarbaeva málimdedi.

«Kún saıyn eriktiler front-ofısiniń sall-ortalyǵyna qala turǵyndarynan 1000-nan astam qońyraý kelip tústi. Gýmanıtarlyq kómek qabyldaý pýnktine kúnine 500-den astam adam keldi. Kómek jınaý pýnktiniń jumysyna qalanyń 30-dan astam iri volonterlik uıymy, 200 volonter jáne radıoelektronıka jáne baılanys áskerı - ınjenerlik ınstıtýtynyń 100-den astam kýrsanttary jumyldyryldy», – deıdi Baǵdat Anarbaeva.

Aıtýynsha, eriktilerdiń negizgi bóligi gýmanıtarlyq kómekti qabyldaý, oraý jáne jınaqtaý jumystaryna tartyldy. Almatydan Atyraý oblysy men Aqtóbe qalasyna 50 - ge jýyq erikti bardy.

Gýmanıtarlyq kómek jınaý pýnktiniń jumysyna buqaralyq aqparat quraldary, blogerler men medıa tulǵalar úlken aqparattyq qoldaý kórsetti.

Osy jyldyń 29 naýryzy men 15 mamyry aralyǵynda 592 tonna gýmanıtarlyq kómek jınaldy (200 tonna azyq – túlik, 147 tonna gıgıenalyq quraldar, 70 tonna kıim, qalǵan 35 tonna-turmystyq zattar), olardan jóneltilgenderi:

- Oralǵa 70 tonna (40-avıareıspen, 30-fýramen);

- Aqtóbe oblysyna 44 tonna (40-fýramen, 4-avıareıs);

- Atyraý oblysyna 268 tonna (13-avıareıspen, 253-fýramen);

- Qostanaı oblysyna 70 tonna (10-júk kóligi, 60-fýra);

- Petropavlǵa 140 tonna (65 – júk kóligi, 35 – «Mitsubishi Delica» markaly kólikpen jáne 40-fýramen).