Almatydan Pragaǵa ushý jeńildedi: Vietjet jańa baǵyt ashty
ASTANA. KAZINFORM — 10 qazannan bastap Vietjet áýe kompanııasy Hanoı — Almaty — Praga baǵyty boıynsha turaqty reısterdi oryndaı bastady. Ushaqtar aptasyna eki ret qatynaıdy, al jolaýshylar Almatydan Pragaǵa bólek bılet satyp ala alady. Bul týraly «Kazakh Tourism» UK» AQ málim etti.
Jańa baǵyt Qazaqstannyń halyqaralyq kólik baılanysyn keńeıtip, Almatynyń Ońtústik-Shyǵys Azııa men Eýropa arasyndaǵy tranzıttik torap retindegi áleýetin nyǵaıtady.
Vetnam Qazaqstanǵa kelý týrızmin damytýdaǵy perspektıvaly naryqtardyń biri bolyp tabylady.Týrıstik statıstıka derekterine sáıkes, 2023 jyly Qazaqstanǵa Vetnamnyń 4,4 myń azamaty kelse, 2024 jyly bul kórsetkish 5,8 myń adamǵa (+30%), al 2025 jyly 8,1 myń adamǵa (+41%) jetti. 2026 jyldyń alǵashqy segiz aıynda kórsetkish 6,7 myń adamdy qurady. Bul vetnamdyq saıahatshylardyń Qazaqstanǵa degen qyzyǵýshylyǵynyń artyp kele jatqanyn kórsetedi.
Kompanııanyń málimetinshe, Chehııa da Qazaqstanǵa kelý týrızmin damytý úshin aıtarlyqtaı áleýetke ıe. 2023 jyly Qazaqstanǵa Chehııanyń 3,3 myń azamaty kelse, 2024 jyly bul kórsetkish 4,1 myń adamǵa (+22%), al 2025 jyly 4,4 myń adamǵa (+7%) jetti. 2026 jyldyń alǵashqy segiz aıynda týrıstik aǵyn 3,8 myń adamdy qurap, oń dınamıkanyń saqtalyp otyrǵanyn kórsetedi.
— Halyqaralyq áýe qatynasynyń keńeıýi Qazaqstannyń kóliktik qoljetimdiligin arttyrýǵa jáne halyqaralyq týrıstik naryqtaǵy ornyn nyǵaıtýǵa yqpal etedi. Vietjet áýe kompanııasynyń jańa baǵyty Azııa men Eýropa arasyndaǵy áýe saıahattarynyń múmkindikterin keńeıtip, kelý týrızmin, iskerlik baılanystardy jáne halyqaralyq yntymaqtastyqty damytýǵa qosymsha alǵysharttar qalyptastyrady, — dedi «Kazakh Tourism» UK» AQ Basqarma tóraǵasynyń orynbasary Edige Ádilhanov.
Reıster aptasyna eki ret – seısenbi jáne senbi kúnderi Airbus A330 áýe kemelerimen oryndalady. Almaty Hanoı – Praga baǵytyndaǵy tehnıkalyq aıaldama bolyp tabylady. Sonymen qatar, Almaty – Praga baǵyty boıynsha bıletti bólek satyp alý múmkindigi jańa áýe qatynasyn Qazaqstan men Chehııa arasyndaǵy saıahattar úshin paıdalanýǵa jol ashady.
Jańa baǵyttyń iske qosylýy Qazaqstannyń halyqaralyq kólik baılanysyn keńeıtýge jáne sheteldik saıahatshylar úshin elimizdiń qoljetimdiligin arttyrýǵa baǵyttalǵan taǵy bir mańyzdy qadam bolyp tabylady.
