Almatydan Pavlodarǵa bet alǵan ushaq keri oraldy
ASTANA. KAZINFORM — 20 qazanda Almatydan Pavlodarǵa ushqan FlyArystan áýe kompanııasynyń reısi ushyp shyqqan áýejaıǵa oraldy. Al keri baǵyttaǵy reıs toqtatyldy. Buǵan Pavlodar áýejaıynda ushaqty muzdanýǵa qarsy óńdeý múmkindiginiń bolmaýy sebep bolǵan
Kompanııanyń málimetinshe, FS-7131 reısi Almatydan ushyp shyqqannan keıin keri qaıtqan. Al Pavlodardan Almatyǵa baǵyttalǵan FS-7132 reısi toqtatyldy.
Ushý kezinde Pavlodardaǵy kún raıy nasharlap, jaýyn-shashyn boljanǵan. Mundaı jaǵdaıda áýe kemesi ushar aldynda muzdanýǵa qarsy arnaıy óńdeýden ótýi kerek. Alaıda Pavlodar áýejaıynda mundaı múmkindik bolmaǵandyqtan, qaýipsizdik maqsatynda ushaqty Almatyǵa qaıtarý týraly sheshim qabyldanǵan.
FlyArystan reısterdiń qaıta bastalatyny týraly qosymsha habarlaıtynyn málimdedi.
Kompanııa jolaýshylarǵa bos oryndar bolǵan jaǵdaıda bıletin eń jaqyn reıske bir ret tegin qaıta rásimdeýge nemese bılet aqshasyn tolyq qaıtaryp alýǵa múmkindik beredi.
Kompanııa brondaý kezinde kórsetilgen telefon nómirlerine habarlama jiberilgenin atap ótti.
Eske salaıyq, buǵan deıin Qazaqstannyń qaı áýejaılarynda ushaqtar qustarmen jıi soqtyǵysatynyn jazǵanbyz.
