Almatydan Óskemenge saparlaý ýaqyty 4 saǵatqa qysqardy
ASTANA. KAZINFORM — Qazaqstannyń týrıstik oryndaryna aparatyn joldar jóndeýden ótip jatyr. Bul týraly Kólik mınıstri Nurlan Saýranbaev búgingi Úkimet otyrysynda aıtty.
Mınıstrdiń aıtýynsha, bıyl elimizde 11 myń shaqyrym joldy jóndeý jáne qurylys jumystary júrgizilýde. Onyń ishinde Rahman qaınary, Kendirli, Baıanaýyl, Zerendi, Kólsaı syndy týrıstik aımaqtardyń joldary bar.
Ákimdikter men ınvestorlar birlesip jol boıyndaǵy qyzmet kórsetý nysandaryn damytý jumystaryn júrgizip jatyr. Onyń ishinde AZS, motelder, dámhanalar bar.
— Bul jumystar týrıstik oryndarǵa jetýdi jeńildetip, jol júrý ýaqytyn qysqartady. Mysaly bıyl Almaty-Óskemen jolyn tolyq bitirdik, jol júrý ýaqyty 4 saǵatqa qysqardy. Sonymen qatar qozǵalys qaýipsizdigin arttyryp, avtomobıl joldarynyń ótkizý qabiletin jaqsartty, — dedi Kólik mınıstri.
Aıta keteıik, búgin Úkimet týrızmdi damytý máselelerin qarastyryp jatyr.
