Almatydan kóktemde 1200 ulan áskerge shaqyrylady
ALMATY. KAZINFORM – Almatyda merzimdi áskerı qyzmetke kóktemgi shaqyrý naýqany 1 naýryzda bastalyp, 30 maýsymǵa deıin jalǵasady. Bul týraly óńirlik kommýnıkatsııalar qyzmeti brıfınginde Almaty qalasy Qorǵanys isteri departamentiniń zań qyzmetiniń bastyǵy Dáýrenbek Shegebaev aıtty.
Spıkerdiń sózinshe, bıyl aqpan aıynyń basynda QR Prezıdenti 2024 jyly merzimdi áskerı qyzmetke shaqyrý týraly Jarlyqqa qol qoıdy. 1 naýryzdan bastap ákimder orynbasarlarynyń tóraǵalyǵymen qalalyq jáne aýdandyq shaqyrý komıssııalary azamattardy kóktemgi merzimdi áskerı qyzmetke shaqyrýdy bastady.
«Shaqyrý naýqany 1 naýryzda bastalyp, 30 maýsymǵa deıin jalǵasady. 30 maýsymǵa deıin respýblıkadaǵy Qarýly kúshterdiń, basqa da áskerler men áskerı qurylymdardyń qatary áskerge shaqyrýdy keıinge qaldyrýǵa nemese bosatýǵa negizderi joq 18 ben 27 jas aralyǵyndaǵy 20 myńnan astam er adammen tolyǵady. Kóktemgi shaqyrý naýqanyna Almaty qalasy boıynsha 1200 azamat áskerge shaqyrylady. Onyń ishinde QR Qarýly kúshteri qataryna – 860, Shekara qyzmetine – 250 azamat, qalǵan azamattar Memlekettik kúzet qyzmeti, Tótenshe jaǵdaılar mınıstrilginiń, Ulttyq ulannyń áskerı bólimderine shaqyrylady. Jyl sońyna deıin Almaty qalasy boıynsha 2500-ge jýyq aazamatty áskerge shaqyrý josparlanǵan», - dedi Dáýrenbek Shegebaev.
Áskerge shaqyrylýshylardy habardar etý biryńǵaı baılanys ortalyǵynyń 1414 servısi arqyly SMS-habarlamalardy, sondaı-aq úı jáne jumys mekenjaılaryna jiberiletin derbes shaqyrý qaǵazdaryn jiberý arqyly júzege asyrylady. Merzimdi áskerı qyzmetten keıin jas jigittiń UBT-da jınaǵan baldary eskerilmeı, áskerı jáne azamattyq joǵary oqý oryndaryna túsýge quqyǵy bar, al merzimdi qyzmette erekshelengen sarbazdarǵa oqý oryndarynan tegin oqýǵa granttar beriletinin atap ótti. Sondaı-aq áskerge shaqyrylýshylar áskerı boryshyn ótegen soń ary qaraı kelisimshart boıynsha qyzmet etý múmkindigine ıe bolady.
«Merzimdi áskerı qyzmetten keıin kelisimsharttyq negizde qalǵysy keletinder az emes, sebebi, munda qolda bar áleýmettik paket, atap aıtqanda, turaqty jalaqy, tegin medıtsınalyq qamtamasyz etý, erte zeınetke shyǵý, zattaı qamtamasyz etý jáne jeke turǵyn úı satyp alý úshin turǵyn úı tólemderi bar», - dedi Dáýrenbek Shegebaev.
Onyń aıtýynsha, beıbit ýaqytta azamattar áskerı qyzmetke shaqyrylýdan kelesi jaǵdaılarda bosatylady:
- densaýlyq jaǵdaıy boıynsha áskerı qyzmetke jaramsyz dep tanylǵan;
- 27 jasqa tolǵannan keıin merzimdi áskerı qyzmetke zańdy negizde shaqyrylmaǵan;
- áskerı qyzmet ótkerý kezeńinde qyzmettik mindetterin atqarý kezinde týystarynyń biri (ákesi, anasy, aǵasy nemese ápkesi) qaıtys bolǵan, qaıtys bolǵan nemese birinshi nemese ekinshi toptaǵy múgedek bolǵan;
- basqa memlekette áskerı (balama) qyzmet ótkergen;
- «QR arnaýly memlekettik organdary týraly» QR 51-babynyń 9-tarmaǵynda kózdelgen jaǵdaılardy qospaǵanda, Qazaqstan Respýblıkasynyń arnaýly memlekettik organdarynda qyzmet ótkergender;
- ǵylymı dárejesi bar;
- tirkelgen dinı birlestikterdiń dinı qyzmetkerleri.
Áskerı qyzmetke shaqyrýdy keıinge qaldyrý Zańnyń 35-babyna sáıkes mynadaı negizder boıynsha beriledi:
- otbasylyq jaǵdaılar boıynsha (otbasy músheleriniń arasynda múgedektigi bar, nekege turǵan jáne otbasynda bir jáne odan da kóp balalary bar otbasy asyrýshysy);
- oqýyn jalǵastyrý úshin (qashyqtyqtan oqytýdy qospaǵanda, oqý kezeńine);
- densaýlyq jaǵdaıy boıynsha (shaqyrý komıssııasynyń sheshimimen);
- basqa sebepter boıynsha (quqyq qorǵaý organdaryna oqýǵa túsetin pedagogterge, dárigerlerge, depýtattarǵa, ushý ekıpajdary men kemeleriniń múshelerine, olarǵa qatysty anyqtaý júrgiziledi).
Spıker áskerdegi qyzmetten jaltarǵany úshin jaýapkershilikti de eske saldy.
«Áskerı qyzmetke shaqyrýdan jaltarý myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne 400 saǵatqa deıingi merzimge qoǵamdyq jumystarǵa tartýǵa ne bas bostandyǵyn shekteýge nemese ony bir jylǵa deıingi merzimge aıyrýǵa jazalanady», - dedi Dáýrenbek Shegebaev.
