Almatydan Qyzylordaǵa bet alǵan Air Astana ushaǵy keri qaıtýǵa májbúr boldy

ALMATY. KAZINFORM – 13 qańtarda Almaty – Qyzylorda baǵytynda ushyp shyqqan KS985 reısin oryndaǵan Airbus A320 áýe kemesi áýege kóterilgennen keıin keri qaıtýǵa májbúr boldy. Bul týraly Air Astana baspasóz qyzmeti habarlady.

Kompanııanyń málimetinshe, ushý barysynda áýe kemesinde yqtımal tehnıkalyq aqaý baryn bildiretin ındıkator iske qosylǵan. Qyzylorda áýejaıynda qajetti tehnıkalyq mamandar bolmaǵandyqtan, ekıpaj qaýipsizdik talaptaryna sáıkes ushyp shyqqan áýejaıǵa – Almatyǵa oralý týraly sheshim qabyldaǵan.

– Avıatasymaldaýshynyń ınjenerlik-tehnıkalyq qyzmeti óndirýshiniń nusqaýlyǵyna sáıkes qajetti tekserýlerdi oryndady. Aqaýlar anyqtalmaǵandyqtan áýe kemesi qaıta paıdalanýǵa berildi, - delingen habarlamada.

Alaıda Almatydaǵy aýa raıynyń qolaısyzdyǵyna jáne Airbus NEO ushaqtaryna qatysty paıdalaný shekteýlerine baılanysty reısti FlyArystan áýe kemesimen oryndaǵan. Osyǵan baılanysty reıs taǵy da kidirdi.

Ushaq Almatydan 02:34-te qaıta ushyp shyqty. Jalpy keshigý ýaqyty – 12 saǵat 24 mınýt.

– Tasymaldaýshy reıstiń keshigýi kezinde jolaýshylarǵa ystyq tamaq pen sýsyndar usyndy. Suranys boıynsha 36 jolaýshy qonaq úıge ornalastyryldy, - dep habarlady kompanııa.

Eske salaıyq, buǵan deıin Air Astana Almatydan ushyp shyǵatyn keshki reısterin tuman men kóriný qashyqtyǵy 150 metrden kem bolýyna baılanysty keshiktirip jatqanyn habarlaǵanbyz.