Almatydan Qaskeleń men Uzynaǵashqa qatynaıtyn avtobýstar jolǵa shyqty

ALMATY. KAZINFORM - 1 qarashadan bastap taǵy úsh qala mańy marshrýty iske qosyldy.

№245 baǵyty Uzynaǵash aýylynyń avtobeketinen – Tóle bı-ıAssaýı avtobeketine deıin. Bul baǵytta úlken syıymdylyqtaǵy 25 avtobýs qyzmet kórsetedi. Qozǵalys ýaqyty: 5:45-ten 23:00-ge deıin. Tasymaldaýshy – «Ecobus service» JShS.

№254 avtobýs Qaskeleń – «Sálem» bazary. Munda úlken syıymdylyqtaǵy 16 avtobýs jumys isteıdi. Qozǵalys ýaqyty: 5:50-den 23:00-ge deıin. Tasymaldaýshy – «Mádına» JShS.

№239 qoǵamdyq kólik «B.Momyshuly» metro beketi – Dolan aýyly. Bul baǵytta 18 avtobýs qyzmet kórsetedi. Qozǵalys ýaqyty: 5:30-dan 23:01-ge deıin. Tasymaldaýshy – «Neo City Trans» JShS.

Jol aqysy qala ishindegi sııaqty 120 teńge, barlyq avtobýs «Onay» elektrondy bıletteý júıesimen jabdyqtalǵan.

Aıta ketý kerek, jolaýshylar men júkti avtokólikpen tasymaldaý erejesine sáıkes, bul marshrýttar tasymaldaýshylarǵa baıqaý ótkizilgenge deıin ýaqytsha berildi jáne synaq rejıminde jumys isteıdi. Monıtorıng nátıjesi boıynsha marshrýttardyń qozǵalys syzbalary jolaýshylar legi men halyqtyń qajettiligine qaraı túzetiledi.

Esterińizge sala keteıik, ótken jyly megapolıs basshysy Erbolat Dosaevtyń tapsyrmasymen 600 avtobýs pen 100 trolleıbýs satyp alynyp, 50-ge jýyq eldi mekendi qamtıtyn 22 jańa baǵyt, sonyń ishinde 10 qala mańy marshrýty uıymdastyryldy. Bıyl taǵy 600 avtobýs, 112 trolleıbýs jáne 100 elektr avtobýsy satyp alyndy.

Buǵan deıin Almatyda qala mańyna qatynaıtyn úsh jańa avtobýs baǵyty ashylǵanyn jazǵan bolatynbyz.