Almatydan deportatsııalanatyn sheteldikter sany jyl saıyn artyp keledi
ALMATY. KAZINFORM — Almatyǵa keletin sheteldikter arasynda kóshi-qon zańnamasyn buzatyndar sany kóbeıip otyr.
Kazinform agenttiginiń saýalyna jaýap bergen Almaty qalasy polıtsııa departamenti bıyl megapolıste shetel azamattary tarapynan 16 975 kóshi-qon zańnamasyn buzý derekteri tirkelgenin habarlady.
Onyń ishinde 2 211 azamat sot qaýlysymen Qazaqstan Respýblıkasynyń aýmaǵynan 5 jylǵa shyǵarylǵan. Qalǵandaryna QR ÁQBtK 517-babynyń talaptary boıynsha aıyppul salynyp, eskertý jasalǵan.
Odan bólek qalada zańsyz júrgen azamattardyń eńbegin paıdalanǵan 214 qazaqstandyq azamat pen uıym jaýapqa tartylǵan.
Jalpy Kóshi-qon qyzmeti basqarmasynyń málimetine sáıkes, keıingi jyldary sot qaýlysymen elden shyǵarylǵan sheteldik azamattardyń sany kelesideı:
— 2022 jyly — 744 azamat;
— 2023 jyly — 1568 azamat,
— 2024 jyly — 2536 azamat.
— Almaty qalasynda zańsyz júrgen sheteldikterdiń kóbi ártúrli jumys isteıdi, alaıda negizgi bóligi — qurylys salasynda, — dep túsindirdi polıtsııa departamentinen.
Sheteldikter qalaı zańdy jumys isteı alady
Al Almaty qalasy jumyspen qamtý jáne áleýmettik baǵdarlamalar basqarmasynyń málimetinshe, keıingi jyldary qalada zańdy túrde jumys isteıtin sheteldikterdiń de sany artqan. Atap aıtqanda:
— 2022 jyly — 1199;
— 2023 jyly — 1242;
— 2024 jyly — 1283;
— 2025 jyly — 1674 sheteldik azamatqa Almatyda zańdy jumys isteýge ruqsat berildi.
Sonymen qatar vedomstvo sheteldikterdi zańdy túrde jumysqa ornalastyrý protsessi qalaı júretinin túsindirdi. Aldymen, jumys berýshi bos jumys orny týraly habarlandyrýdy elektrondyq eńbek bırjasyna jarııalaıdy. Oǵan 15 kún ishinde tıisti úmitker tabylmasa, jumys berýshi habarlandyrýdyń kodyn kórsete otyryp, sheteldik jumys kúshin tartýǵa ruqsat berý týraly jergilikti atqarýshy organǵa ótinish jiberedi.
Jergilikti atqarýshy organ ótinishti 6 jumys kúni ishinde qujattardy memlekettik qyzmetti kórsetýge qoıylatyn talaptarǵa sáıkes kelýin qarap, ruqsat berý ne berýden bas tartý týraly sheshim qabyldaıdy.
— Qazaqstan aýmaǵynda eńbek etý úshin sheteldik jumys kúshiniń bilim deńgeıi jáne jumys ótili kásiptik standarttarǵa saı bolǵanda nemese basshylar, mamandar jáne basqa da qyzmetshiler laýazymdarynyń biliktiligi joǵary bolǵanda ruqsat beriledi. Odan bólek ujymdaǵy birinshi jáne ekinshi sanattarǵa jatatyn jumyskerlerdiń sanynyń keminde 70 paıyzy, úshinshi jáne tórtinshi sanattarǵa jatatyn jumyskerlerdiń sanynyń keminde 90 paıyzy Qazaqstan Respýblıkasy azamattary bolýy kerek, — dep habarlady vedomstvo.
Sheteldik jumys kúshin paıdalanýǵa ruqsat berilgen soń, belgilengen mólsherleme boıynsha salyq alymy alynady.
Eske salaıyq, Astanada sheteldik azamat Qazaqstannan 200 myń eýrony zańsyz áketýge árekettengeni úshin jaýapqa tartyldy.