Almatydan Atyraý oblysyna 20 tonna gýmanıtarlyq kómek jiberildi
ALMATY. KAZINFORM – Halyqaralyq Otbasy kúni qarsańynda Almaty qalasy men Almaty oblysynan sý tasqynynan zardap shekken Atyraý oblysyna gýmanıtarlyq kómek jiberildi.
Gýmanıtarlyq kómek QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen jınaldy.
Naqty aıtqanda, qarajat pen qajetti jabdyqtardyń jınalýyna Almaty qalasy ákiminiń janyndaǵy Áıelder isteri jáne otbasylyq-demografııalyq saıasat jónindegi komıssııa músheleri, Almaty oblysy ákiminiń janyndaǵy Áıelder isteri jáne otbasylyq-demografııalyq saıasat jónindegi komıssııa músheleri men qalalyq jáne oblystyq Jastar saıasaty basqarmalarynyń qyzmetkerleri atsalysty.
- - Sý tasqyny saldarynan zardap shekken Atyraý oblysyndaǵy jaǵdaıdy bárimiz baqylap otyrmyz. Osy qıyn sátte kúsh-jigerimizdi biriktirip, muqtaj adamdarǵa kómektesý mańyzdy. Halyqaralyq Otbasy kúni qarsańynda biz ózara kómek pen qoldaýdyń mańyzdylyǵyn erekshe túsinemiz. Otbasy – bul bizdiń qoǵamnyń negizi. Qıyn ýaqytta biz bir-birimizdiń tiregimiz bolýymyz kerek. Jiberiletin gýmanıtarlyq kómektiń ishinde azyq-túlik, qajetti jabdyqtar, tósek-oryn, medıtsınalyq preparattar, kıim-keshek jáne t.b. júk bar, – dedi Almaty qalasy ákimi janyndaǵy Áıelder isteri jáne otbasylyq-demografııalyq saıasat jónindegi komıssııanyń hatshysy Gúlnara Ámirova.
