Almatydan álemniń 53 qalasyna tikeleı áýe reısi bar
ALMATY. KAZINFORM – Almaty elimizdiń jetekshi halyqaralyq avıatsııalyq habyna aınalyp keledi. Bul týraly Almaty qalasy týrızm basqarmasynyń basshysy Ǵalııa Toqseıitova málimdedi.
Onyń aıtýynsha, 2026 jyldyń 5 aıynda Almaty áýejaıynyń halyqaralyq termınaly 2,2 mıllıon sheteldik jolaýshyǵa qyzmet kórsetken. Bul ótken jyldyń 5 aıymen salystyrǵanda 10%-ǵa joǵary. Osy ýaqyt aralyǵynda 20,6 myń halyqaralyq áýe reısi oryndalyp, olardyń sany 8,6%-ǵa artqan.
Jalpy qańtar-mamyr aılarynyń qorytyndysy boıynsha Almaty álemniń 53 qalasymen tikeleı áýe qatynasyn qamtamasyz etip otyr. Onyń ishinde bıyldan beri Shanhaı, Tashkent, Pýsan, Varshava, Dalaman, Larnaka jáne Erevan qalalaryna turaqty jáne maýsymdyq reıster ashyldy. Sonymen qatar Samarqand, Frankfýrt jáne Seýl baǵyttary boıynsha áýe qatynasy qaıta jandandy.
- Halyqaralyq áýe qatynasyn keńeıtý Almatynyń kólik qoljetimdiligin arttyryp, týrızmniń damýyna serpin beredi, iskerlik baılanysty nyǵaıtady jáne qala ekonomıkasynyń damýyna qosymsha múmkindik ashady, – dedi Ǵalııa Toqseıitova.
Eske salaıyq, buǵan deıin Almaty áýejaıynyń halyqaralyq termınalynda jeldetý júıesiniń qubyry qulady.
Almaty áýejaıyndaǵy oqıǵadan keıin tekseris júrgiziletini belgili boldy.
