Almatydan Aqtaýǵa ońaı tabys izdep kelgen qyz 7 jylǵa sottaldy
ASTANA. KAZINFORM - Almatydan Aqtaýǵa kelgen 20 jastaǵy boıjetken Telegram arqyly esirtkini «tyǵyn»tásilimen taratýdy kózdegen.
Qylmystyq áreketi der kezinde áshkerelenip, onyń janynan sıntetıkalyq psıhotroptyq zattardyń 27 oramy tárkilendi.
Aqtaý qalalyq sotynyń úkimimen ol Qylmystyq kodekstiń 297-baby 3-bóliginiń 1), 3) tarmaqtarymen kináli dep tanylyp, 7 jylǵa bas bostandyǵynan aıyryldy. (Úkim zańdy kúshine endi.)
Telegram arqyly «ońaı tabys», «kýrer» nemese «zakladka» sııaqty jumys usynatyn habarlamalar – aqsha tabýdyń joly emes, qylmystyq jaýaptylyqqa aparatyn jol.
– Birneshe myń teńge úshin ómirińizdi qurtyp almańyz! - delingen Mańǵystaý oblysynyń prokýratýrasy habarlamasynda.
Aıta keteıik, Qostanaı oblysy Beıimbet Maılın aýdanynyń turǵyny ońaı jolmen aqsha tabý úshin 10 myń teńgege banktik shotyn alaıaqtarǵa bergen. Nátıjesinde onyń shoty qylmystyq shemaǵa paıdalanylyp, ózi qylmystyq jaýapqa tartyldy.
