Almatydaǵy júktilikti qorǵaý ortalyǵynda qandaı qyzmet kórsetiledi

ALMATY. KAZONFORM – Almaty perınatologııa ortalyǵynyń bazasynda júktilikti qorǵaý ortalyǵy ashyldy. Munda bir tereze qaǵıdaty boıynsha júktilik kezinde dıagnostıkalaýdyń tolyq tsıklynan ótýge bolady.

Bul týraly Almaty qalasy ákiminiń orynbasary Ásem Núsipova megapolıstiń ınklıýzıvti ortany damytý jónindegi keńestiń birinshi otyrysynda aıtty.

Ortalyqtyń negizgi mindeti-ýltradybystyq skrınıng júrgizý jáne pánaralyq prenataldy konsılıým qurý arqyly jatyrishilik aqaýlardy anyqtaý.

Bıyl Perınatologııa jáne balalar kardıohırýrgııasy ortalyǵynda júktiliktiń anyqtalǵan damý aqaýlaryn jatyrishilik túzetý maqsatynda uryq hırýrgııasyn engizý bastaldy, bul perınataldyq ólim-jitim men balalardyń múgedektigin azaıtýǵa múmkindik beredi.

Tórt maman Izraılde, Reseıde fetaldy hırýrgııa boıynsha oqýdan ótti. Sondaı-aq dárigerlerdi Úndistanǵa oqýǵa jiberý josparda.

«Sonymen qatar, jergilikti bıýdjet qarajaty esebinen 1,9 mlrd teńge somasyna uryqtyń týa bitken kemshiligin dıagnostıkalaý, anyqtaý jáne jatyrishilik túzetý úshin jabdyq satyp alyndy. Sondaı - aq, «Aıala» qory 17,7 mln teńgege fetaldy hırýrgııaǵa arnalǵan jabdyqtar usyndy», - dep atap ótti Ásem Núsipova.