Almatydaǵy jol apaty: Prezıdent tapsyrmasynan keıin ІІM tergeýdi kúsheıtti
ASTANA. KAZINFORM – Іshki ister mınıstrligi Memleket basshysynyń 2026 jylǵy 30 naýryzda Qaýipsizdik keńesiniń otyrysynda bergen tapsyrmasyna sáıkes Almaty qalasynda bolǵan rezonanstyq jol-kólik oqıǵasy boıynsha tergeý jumystary kúsheıtilgenin málimdedi.
ІІM málimetinshe, atalǵan jol-kólik oqıǵasy faktisi boıynsha qylmystyq is qozǵalǵan. ZEEKR avtokóliginiń júrgizýshisi sot sheshimimen qamaýǵa alyndy. Tergeý barysynda onyń apat kezinde alkogoldik masań kúıde bolǵany anyqtaldy.
Sonymen qatar burynǵy polıtsııa qyzmetkeriniń áreketsizdigi jáne memlekettik nómirlik belgilerdiń zańsyz berilýi faktileri boıynsha da qylmystyq ister tirkeldi. Atalǵan isterdi ІІM-niń Ózindik qaýipsizdik departamenti tergep jatyr. Qoǵamda taralǵan barlyq málimet jan-jaqty tekserilýde.
Jaǵdaıǵa obektıvti baǵa berý maqsatynda Almaty qalasyna ІІM komıssııasy jiberildi. Onyń quramyna Ózindik qaýipsizdik departamenti, Ákimshilik polıtsııa komıteti jáne Jeke qurammen jumys jónindegi departament ókilderi kirgen.
Qyzmet barysynda jiberilgen kemshilikter úshin Almaty qalalyq Polıtsııa departamenti bastyǵynyń orynbasary, sondaı-aq ákimshilik polıtsııa jáne qoǵamdyq qaýipsizdik basqarmalarynyń basshylary qyzmetterinen bosatyldy.
Qazirgi ýaqytta qyzmettik tártipti kúsheıtý jáne zańdylyqty qamtamasyz etý boıynsha qosymsha sharalar qabyldanýda. Almaty qalasyna ózge óńirlerden polıtsııa jasaqtary jiberilip, keń aýqymdy tekserý jáne reıdtik is-sharalar júrgizilýde.
Alǵashqy kúnderdiń ózinde 4,8 myńnan astam jol júrisi qaǵıdalaryn buzý deregi anyqtalǵan. Olardyń qatarynda mas kúıinde kólik basqarý, qarsy jolaqqa shyǵý, jalǵan nómir qoldaný jáne júrgizý quqyǵynsyz kólik basqarý faktileri bar. 2 myńnan astam avtokólik aıyppul turaǵyna qoıylǵan.
ІІM málimetinshe, mundaı kúsheıtilgen is-sharalar respýblıka kóleminde júrgizilip jatyr.
— Tergeý barysy meniń jeke baqylaýymda. Barlyq kináliler zań talaptaryna sáıkes jaýapkershilikke tartylady. Eshkim de mártebesine, laýazymyna jáne baılanystaryna qaramastan jaýapkershilikten jaltara almaıdy, — dep jazdy Іshki ister mınıstri Erjan Sadenov.
