Almatydaǵy jylý jelileriniń 54%-y tozǵan: qala qysqa daıyn ba
ALMATY.KAZINFORM — Almatynyń jylý energetıkasy nysandary 2026–2027 jyldardaǵy jylytý maýsymyna 100 paıyz daıyn. Bıyl qalada 21,1 shaqyrym jylý jelisi jańartylǵanymen, paıdalaný merzimi 25 jyldan asatyn qubyrlardyń tozý deńgeıi áli de 53,9%. Qys kezinde jylýmen qamtýda qandaı táýekelder bar jáne aıaz kúsheıgende júıe qalaı jumys isteıdi? Kazinform tilshisi Almaty qalasynyń Energetıka jáne sýmen jabdyqtaý basqarmasy men «Almaty jylý júıesi» JShS-dan surap bildi.
Jylý nysandary qysqa daıyn ba?
Almaty energetıka jáne sýmen jabdyqtaý basqarmasynyń málimetinshe, «Almatyteplokommýnenergo» JShS kommýnaldyq kásipornynyń teńgeriminde 89 qazandyq bar. Bıyl olardyń ekeýine qaıta jańǵyrtý jumystary júrgizilip, 85 qazandyq jóndelgen.
Osylaısha, qaladaǵy jylý energetıkasy nysandary bıylǵy jylytý maýsymyna tolyq daıyn dep sendirdi.
— Jylý óndirýshi nysandardyń negizgi tehnologııalyq jabdyqtary tehnıkalyq talaptarǵa sáıkes jumys isteýge daıyn. Qatty aıaz kezinde jylý júktemesiniń artýy eskerilip, jabdyqtardyń turaqty ári úzdiksiz jumysyn qamtamasyz etý sharalary qabyldandy, — delingen basqarmanyń resmı jaýabynda.
Vedomstvonyń habarlaýynsha, qysqy kezeńge qajetti rezervtik otyn qory qalyptastyrylǵan. Qazir onyń kólemi belgilengen normatıvten joǵary. Sonymen qatar jylý óndirýshi nysandardyń qosalqy jabdyqtary men rezervtik qýat kózderi tekserilip, qajetti tehnıkalyq sharalar atqarylǵan.
Basqarma qolda bar óndiristik qýattar qaladaǵy turǵyn úıler men áleýmettik nysandardyń jylý energııasyna degen qajettiligin tolyq qamtamasyz etýge jetkilikti ekenin atap ótti.
Paıdalaný merzimi ótip ketken qubyrlar
Jylý óndiretin nysandar tolyq daıyn bolǵanymen, qalanyń jylý jelileriniń tozý deńgeıi áli de joǵary. «Almaty jylý júıesi» JShS málimetinshe, paıdalaný merzimi 25 jyldan asatyn qubyrlardyń tozýy — 53,9%.
Kásiporynnyń habarlaýynsha, 2026 jyly Almatyda 21,1 shaqyrym jylý jelisi jańartylǵan. Jumystar negizinen taratqysh jeliler men aýlaishilik aýmaqtarda júrgizilgen.
— Atqarylǵan jumystardyń nátıjesinde jylý jelileriniń tozý deńgeıi 52,1%-ǵa deıin tómendeıdi degen boljam bar. Bul júıeniń senimdiligin arttyryp, jylýmen jabdyqtaý sapasyn jaqsartýǵa múmkindik beredi, — dep habarlady kásiporyn.
Kásiporynnyń málimetinshe, qazirgi ýaqytta qalanyń barlyq negizgi jylý magıstrali shtattyq parametrlerge sáıkes jumys istep tur.
Ótken maýsymda bes aqaý tirkelgen
Jylý jelileriniń tozýyna baılanysty qysqy kezeńde tehnologııalyq aqaý bolýy da múmkin. Kásiporynnyń dereginshe, 2025–2026 jyldardaǵy jylytý maýsymynda II dárejeli bes aqaý tirkelgen. I dárejeli apattar bolmaǵan.
Al bıyl jylytý maýsymy bastalǵaly beri II dárejeli bir aqaý baıqaldy. Kásiporyn aqaý birneshe saǵat ishinde joıylǵanyn aıtady.
Qatty aıazda jylý berý qalaı baqylanady?
Jylytý maýsymynda, ásirese aýa temperatýrasy kúrt tómendegen kezde, jylý jelilerine túsetin júkteme artady. Osy kezeńde júıeniń jumysyn baqylaý úshin kásiporynnyń dıspetcherlik qyzmeti gıdravlıkalyq rejımder men qosymsha jylý kólemin úzdiksiz qadaǵalaıdy.
Eske salaıyq, Almatydaǵy № 2 JEO kómirden gazǵa kóship jatqany habarlandy.
Sondaı-aq Almatydaǵy JEO-2 kómirden qashan tolyq bas tartatyny aıtyldy.
