Almatydaǵy jylý elektr ortalyqtary qashan gazǵa aýysady
ALMATY. KAZINFORM – Almatyda birneshe jyldan beri qalanyń ekinshi jáne úshinshi jylý elektr ortalyqtaryn gazǵa aýystyrý boıynsha jumystar júrgizilip jatyr.
Jyl basynda Energetıka mınıstri Erlan Aqkenjenov Almatyǵa jumys saparymen kelip, JEO-2 jáne JEO-3 qurylys alańdaryn aralap shyqty. Vedomstvo basshysy JEO-2 nysanynda oń dınamıka bar ekenin aıtsa, al JEO-3 qurylys alańyndaǵy jaǵdaıdy qatań synǵa alǵan bolatyn. Mınıstr keı jumystardyń kesteden qalyp kele jatqanyn atap ótti.
Osy oraıda, Kazinform agenttigi energetıkalyq toraptarǵa ıelik etetin «Almaty elektr stantsııalary» AQ (AlES), sondaı-aq qurylys qarqynyn baqylaý ustap otyrǵan Energetıka mınıstrligine júginip, Almaty ekologııasy úshin mańyzy jobalardyń qandaı satyda ekenin surady.
AlES damý jáne qurylys jónindegi basqarýshy dırektory Erjan Býrambaevtyń jaýabyna sáıkes, JEO-2 nysanyn gazǵa kóshirý jobasynyń daıyndyq deńgeıi – 64%. Qazirgi ýaqytta qadalardy quıý, irgetasty ornatý, sý jylytý qazandyqtaryn montajdaý jáne gıdravlıkalyq synaqtan ótkizý jumystary aıaqtalǵan. Qazandyqtardyń tútin shyǵaratyn aınalmaly qubyrlarynyń metall konstrýktsııalaryn montajdaý protsesi júrip jatyr.
– JEO-2 jumys alańynda qazirgi ýaqytta 1500-ge jýyq adam eńbek etip júr. Nysandy gazǵa kóshirýge qajetti materıaldar men jabdyqtar 99% kóleminde satyp alynyp, mekenjaıǵa jetkizildi, - dedi ol.
Sonymen qatar Erjan Býrambaev ekinshi jylý elektr ortalyqty gazǵa tolyq kóshirip, ony paıdalanýǵa berý 2026 jyldyń jeltoqsan aıyna josparlanǵanyn atap ótti. Onyń aıtýynsha, qurylys-montajdaý jumystary kestege saı júrip jatyr jáne belgilengen merzimderden aýytqý kútilmeıdi. Bekitilgen kesteden qalys qalý derekteri joq.
Al agenttik saýalyna bergen jaýabynda Energetıka mınıstrligi JEO-2 boıynsha bas korpýs aımaǵynda úsh gaz týrbınasy, tórt sý jylytý qazandyǵy ornatylyp, gıdravlıkalyq synaqtar aıaqtalǵanyn habarlady. Qazir qazandyqtyń bas korpýsyn jabý jumystary qalǵan. Vedomstvo mınıstr tarapynan syn aıtylǵan JEO-3 boıynsha da jaýap berdi. Bul jylý elektr ortalyǵy da 2026 jyldyń sońyna deıin tolyq gazǵa aýysýy tıis.
– JEO-3 nysanynda Ansaldo Energia kompanııasynyń týrbınasy men generatorynyń alǵashqy jıyntyǵy irgetasqa ornatyldy. Týrbınamen men generatorynyń ekinshi jıyntyǵy merdiger qoımasyna jetkizildi. Energetıka mınıstri Erlan Aqkenjenovtyń jumys sapary barysynda bergen eskertýleri men tapsyrmalaryna sáıkes, eki joba boıynsha da jumys kestelerine túzetýler engizildi. Merdiger uıymdar tarapynan qosymsha jumys kúshi men tehnıka jumyldyrylyp, jumystar eki aýysymda uıymdastyryldy, - delingen mınıstrlik jaýabynda.
Eske salaıyq, Almatynyń jylý elektr ortalyqtaryn gazǵa aýystyrý máselesi kóp jyldan beri talqylanyp keledi. 2020 jyly Úkimet Almaty JEO-2-ni gazdandyrý jobasy maquldandy.
2022 jyly 25 qarashada «Almaty elektr stantsııalary» AQ (AlES) men Eýropa Qaıta qurý jáne Damý banki (EQDB) arasynda «Qorshaǵan ortaǵa tıgizetin áserin barynsha azaıtý arqyly Almaty JEO-2-ni jańǵyrtý» jobasyn qarjylandyrý týraly kredıttik kelisim jasaldy. Atalǵan mámileniń somasy – 130 mlrd teńge.
2023 jyly Almatynyń JEO-2 nysanyn kómirden gazǵa aýystyrý tenderin konsortsıým jeńip aldy. Konsortsıým quramyna úsh qytaılyq kompanııa kiredi: Dongfang Electric International Corporation, Powerchina Sepco1 Electric Power Construction Co., Ltd jáne Powerchina Hebei Electric Power Engineering Co., Ltd.
JEO-2-ni gazǵa kóshirý boıynsha qurylys jumystary 2024 jyly bastaldy. Almaty ekologııa departamentiniń málimetinshe, joba júeze asqan soń, aýaǵa taraıtyn zııandy zattardyń mólsheri jylyna 37 myń tonnadan 2,7 myń tonnaǵa deıin azaıady.
