Almatydaǵy jylý elektr ortalyqtary gazǵa aýystyrylady
ASTANA. KAZINFORM – Nurlybek Nálibaev Almaty qalasyna jumys sapary kezinde ekinshi jáne úshinshi jylý elektr ortalyqtarynda bolyp, aýqymdy jańǵyrtý jumystarynyń barysymen tanysty. Bul týraly Úkimettiń baspasóz qyzmeti habarlady.
Almaty qalasynyń Alataý aýdanyndaǵy ekinshi jylý elektr stansasy – alyp shahardaǵy eń iri jylý kózi. Jańǵyrtý jobasynyń basty maqsaty – energetıka keshenin tabıǵı gazǵa kóshirý arqyly qalany jylýmen jáne energııamen turaqty qamtamasyz etip, aýaǵa taraıtyn zııandy qaldyqtardy azaıtý. Onyń aıasynda jylý qýaty saǵatyna 952 Gkal-ǵa deıin, al elektr qýaty 600 MVt-qa deıin jetetin zamanaýı gaz stansasyn iske qosý kózdelgen.
Jobany júzege asyrý barysynda úsh gaz týrbınasy men generator ornatyldy. Jabdyqtardyń 99%-y jetkizilgen.
Qosalqy ınfraqurylym men jol qurylysy aıaqtaldy. Negizgi nysandardaǵy qurylys-montajdaý jumystarynyń jalpy daıyndyq deńgeıi shamamen 55%. Qazirgi kezde bas korpýs ǵımaraty men sý jylytý qazandyqtarynda, sý jáne gaz daıyndaý pýnktterinde, sondaı-aq elektr tehnıkalyq ınfraqurylym nysandarynda jumys jalǵasýda. Barlyq jumys, sonyń ishinde negizgi jabdyqtardy jetkizý bekitilgen kestege sáıkes júrip jatyr. Jobanyń aıaqtalýy 2026 jyldyń sońyna josparlanǵan.
Sonymen qatar Premer-mınıstrdiń birinshi orynbasary Almaty oblysy Іle aýdanynyń aýmaǵynda ornalasqan úshinshi jylý elektr ortalyǵyn da aralap kórdi. Stansada qaıta jańǵyrtý jumystary aıasynda keminde 450 MVt bolatyn bý-gaz qondyrǵysy salynady jáne tozyǵy jetken jabdyqtar jańartylady. Merdigeri – qazaqstandyq kompanııalar konsortsıýmy.
Búginde qadaly irgetas alańyn ornatý jumystary júrgizilýde, gaz týrbınalyq qondyrǵynyń alǵashqy jıyntyǵy irgetasqa ornalastyryldy, jabdyqtardyń bir bóligi qurylys alańyna montajdalyp qoıyldy. Joba-smetalyq qujattama memlekettik saraptamadan ótý satysynda. Qaıta jańǵyrtýdy aıaqtaý 2027 jylǵa josparlanǵan.
Nurlybek Nálibaev Almatynyń damýy, qala halqynyń ómir sapasyn jaqsartý máselesi Memleket basshysynyń erekshe nazarynda ekenin atap ótti. Energetıkalyq nysandardyń senimdi ári tıimdi jumysyn qamtamasyz etý úshin Úkimet tarapynan barlyq qajetti sharalar qabyldanǵan. Soǵan sáıkes jańǵyrtý jumystaryn belgilengen kesteden keshiktirmeı, der kezinde aıaqtaýdy tapsyrdy.
Sondaı-aq Almaty qalasyna jumys sapary barysynda QR Premer-mınıstriniń birinshi orynbasary Nurlybek Nálibaev Almaty taý klasteri men Almaty Superski jobalarynyń júzege asyrylý barysymen jáne Indýstrıaldy aımaqtyń jumysymen tanysty.
Aıta ketelik Nálibaev Almaty-1 vokzalyndaǵy jumysty tez arada aıaqtaýdy tapsyrǵan edi.
