Almatyda jerasty esirtki zerthanasyn uıymdastyrýshyǵa úkim shyqty

ALMATY. KAZINFORM – Almaty oblysynyń 35 jastaǵy turǵyny 2024 jyldyń qazan aıynda jerasty esirtki zerthanasyn uıymdastyrǵany úshin 8 jylǵa bas bostandyǵynan aıyryldy.

Polıtsııanyń málimetinshe, zerthana Medeý aýdanynyń jeke sektorynda ornalasqan. Qala prokýratýrasynyń úılestirýimen júrgizilgen arnaıy is-shara barysynda polıtsııa qyzmetkerleri 21 keliden astam daıyn mefedron, hımııalyq reagentter, esirtki óndirisi men býyp-túıýge arnalǵan qural-jabdyqtardy tapty jáne tárkiledi. 

– Esirtki zerthanasynyń uıymdastyrýshysy kináli dep tanyldy. Ol tıisti jazasyn alady. Mundaı qylmystar qoǵam úshin úlken qaýip tóndiredi. Sondyqtan Almaty polıtsııasy esirtki qylmysyna qarsy kúresti júıeli túrde jalǵastyryp keledi, - dedi Almaty Polıtsııa departamenti esirtki qylmysyna qarsy kúres basqarmasynyń bastyǵy Murat Jumabaev.

Polıtsııa esirtki jasaǵany jáne taratqany úshin qatań qylmystyq jaýapkershilik qarastyrylǵanyn eske saldy.

Aıta keteıik, bıyl jeti aıda esirtkige qatysty 4 655 quqyqbuzýshylyq anyqtaldy, olardyń 2 100-i aýyr jáne asa aýyr qylmystar sanatyna jatady.

Uıymdasqan qylmystyq toptardy qurý jáne basqarý faktileri boıynsha 24 qylmystyq is qozǵaldy, onyń ishinde úsh transulttyq qylmystyq top joıyldy. 12 basshy men 48 belsendi qatysýshy ustaldy.