Almatydaǵy jer úılerden 270 retten astam órt qaýipsizdigi erejelerin buzý jaǵdaılary anyqtaldy
ALMATY. KAZINFORM – Almatyda órt pen gazdan ýlanýdyń aldyn alý úshin «Qol ushyn sozý» naýqany ótip jatyr. Tótenshe jaǵdaılar departamentiniń mamandary men eriktiler qart kisilerge, muqtaj adamdarǵa, áleýmettik osal toptardaǵy otbasylarǵa kómektesý jumystaryn bastady.
Almatyda ataýly kómek kórsetý úshin 901 otbasy belgilengen. Olardyń ishinde 632 otbasyna túsindirý jumystary júrgizildi. TJD málimetine sáıkes, 100-den astam otbasy mamandardy úıine kirgizbegen. Jalpy úılerdi aralaý kezinde órt qaýipsizdigi erejeleriniń 270-ten astam buzýshylyqtary anyqtaldy. Olar: avtonomdy jylytý júıelerindegi aqaýlar, elektr jelileri men elektr jabdyqtaryn paıdalanýǵa baılanysty ereje buzýshylyqtar jáne t.b.
- Memlekettik órt baqylaý fýnktsııasy jeke turǵyn úı sektor aýmaǵynda júzege asyrylmaıdy. Órt qaýipsizdigi bolýy úshin azamattar órtke qarsy erejelerdi saqtap, mamandardyń eskertýleryn oryndaýy qajet. Ýly gazdy anyqtaıtyn datchıkter az qamtylǵan otbasylarǵa jáne egde jastaǵy adamdarǵa ǵana qarastyrylǵan. Almatyda mundaı 1404 qurylǵy ornatylǵan, – dep habarlady TJD baspasóz qyzmeti.
Sondaı-aq, Tótenshe jaǵdaılar departamentiniń mamandary almatylyqtarǵa órt pen gazdan ýlanýdyń aldyn alý joldaryn usyndy:
- Kómirtegi totyǵyn, ýly gazdardy anyqtaıtyn datchıkterdi ornatyńyz;
- Úıde tozǵan elektr symdaryn aýystyryp, elektr qýatyna tózimdi kúıge keltirińiz;
- Tútin qubyrlaryn, jylytý peshteriniń murjalaryn kúıeden der kezinde tazalańyz;
- Aǵash pen kıimderdi kómirmen jylytatyn pesh ústine, murjalarda jáne elektr peshterinde keptirmeńiz!
