Almatyda jer silkingen kezde zardap shekkenderdiń qazirgi jaǵdaıy qalaı
ALMATY. KAZINFORM - Almatylyq dárigerler jer silkinisi kezinde zardap shekkenderdiń qazirgi jaǵdaıyn aıtty.
Almaty qalalyq qoǵamdyq densaýlyq saqtaý basqarmasynyń málimetinshe, jer silkinisi kezinde zardap shekken úsh eresek adam barlyq qajetti medıtsınalyq kómek alyp jatyr.
«Úsh naýqas qalalyq jedel shuǵyl kómek aýrýhanasynda emdelip jatyr. Bireýiniń hali aýyr, ekeýiniń jaǵdaıy ortasha. Barlyq syrqat tolyq kólemde qajetti medıtsınalyq kómek alady», — dep habarlady basqarmadan.
Sondaı-aq balalar jedel medıtsınalyq kómek kórsetý ortalyǵynda 4 bala emdelip jatyr. Olardyń jaǵdaıy ortasha, birqalypty.
Qańtardyń 22-nen 23-ine qaraǵan túni almatylyqtar qatty jer silkinisin sezindi, saldarynan túrli jaraqat alǵan 67 adam medıtsınalyq kómekke júgingen edi.
