Almatydaǵy jer silkinisi kezinde dabyl qosý qajettiligi týǵan joq - Nurlan Atyǵaev
ALMATY. KAZINFORM – Almatyda jer silkingen kezde dabyl nege qosylǵan joq? Bul saýalǵa baspasóz máslıhaty barysynda Almaty qalalyq Tótenshe jaǵdaılar departamentiniń basshysy Nurlan Atyǵaev jaýap berdi.
Spıkerdiń sózinshe, Almatyda jer silkinisi kezinde iske qosylatyn 843 elektr dabyl qurylǵysy bar. Olar jer dúmpýi 5 balldan asqan kezde ǵana qosylady.
«Túnde dabyldy qosý qajettilik týdyrǵan joq. Sebebi, bizde 5 ball deńgeıinde boldy. Sondaı- aq ol qosylsa turǵyndar arasynda dúrbeleń týdyratyn edi», - dedi Ulttyq seısmologııalyq baqylaýlar men zertteýler ǵylymı ortalyǵynyń dırektory Dáýlet Sársenbaev
Eske salaıyq, Almaty ýaqytymen 23 qańtar kúni 00 saǵat 09 mınýtta jer silkindi. Jerasty dúmpýi megapolısten ońtústik-shyǵysqa qaraı 264 shaqyrym jerde, Qazaqsten men Qyrǵyzstan shekarasy aýmaǵynda boldy.
Energetıkalyq sanaty – 15.1. MPV terbelisi – 6.7. Tereńdigi – 65 km.
Jer silkinisi Almatyda 5 ball deńgeıinde (MSK-64 shkalasy boıynsha) sezildi.
Osy joly jer dúmpýi qatty sezildi. Uzaq ýaqyt boıy shaıqady. Turyǵyndar úreılenip, úıinen kóshege, dalaǵa qashyp shyqty.
Almaty qalalyq Tótenshe jaǵdaılar departamentine jer silkinisi kezinde ǵımarattardyń qıraýy men zardap shekkender týraly aqparat túsken joq.
Megapolıste dereý barlyq jınalý núktesi ashyldy.
Shahardaǵy seısmıkalyq jaǵdaıǵa baılanysty, Erbolat Dosaev jedel shtabtyń shuǵyl keńesin ótkizdi. Shuǵyl keńeste mamandar odan ári is-qımyl josparyn talqylady.
Almaty turǵyndary qatty jer silkinisinen keıin, qaladan jappaı kete bastady. Kóshelerde úlken keptelis paıda bolyp, janarmaı quıý beketterinde uzyn-sonar kezek qalyptasty. Sondaı-aq, taksı baǵasy bir sapar úshin 5 myń teńgeden 20 myń teńgege deıin kóterildi.
Áleýmettik jelilerde Ál-Farabı atyndaǵy Qazaq ulttyq ýnıversıtetiniń jataqhanalary qırady degen aqparat shyqty. Almatydaǵy stýdenttik jataqhanalarda jaǵdaı turaqty ekenin Ǵylym jáne joǵary bilim mınıstrligi habarlady.
Jer silkinisi nátıjesinde 8 adam zardap shekti. Úsh turǵyn kópqabatty úıdiń ekinshi jáne úshinshi qabatynan sekirgen.
