Almatydaǵy jer silkinisi: QazUÝ-dyń jataqhanalarynda jaryqshaq paıda bolǵan
ASTANA. KAZINFORM – Ǵylym jáne joǵary bilim mınıstri Saıasat Nurbek Almatydaǵy jer silkinisiniń saldarynan ál-Farabı atyndaǵy QazUÝ-dyń jataqhanalarynda jaryqshaq paıda bolǵanyn rastady.
«Almatyda qazir 35 ýnıversıtette 198 myń stýdent oqyp jatyr. Biz birden áreket ettik. Alǵashqy terbelister týraly aqparat bolǵan kezde búkil stýdentter qaýipsiz jerge kóshirildi. Rektorlarǵa, prorektorlarǵa, stýdenttik uıymdardyń basshylaryna alǵys aıtqym keledi. Eshqandaı qurban nemese zardap shekkender joq», - dedi mınıstr.
Saıasat Nurbek ál-Farabı atyndaǵy ulttyq ýnıversıtettiń №6 jáne 8 jataqhanalarynyń qıraǵany týraly feık aqparat taraǵanymen, ǵımaratta jaryqshaqtar paıda bolǵanyn rastady.
«Biz oqıǵa ornyna óz ókilderimizdi jiberip, aqparattyń ótirik ekenine kóz jetkizdik. Kishigirim jaryqshaqtar boldy. Onyń ózi negizgi qabyrǵalarda emes. Tıisti jóndeý jumystaryn júrgizemiz», - dedi Saıasat Nurbek.
